ശിവൻകുട്ടി പറയാൻ ബാക്കിവച്ചതോ ബാലചന്ദ്രമേനോൻ പറഞ്ഞുതീർത്തത്… സുരേഷ് ഗോപിയുടെ ദേശീയ അവാർഡ് ചർച്ചയാകുമ്പോൾ

1997ലെ ദേശീയ സിനിമാ അവാർഡ് നിർണയത്തെ പുതിയ വിവാദത്തിലേക്ക് എത്തിച്ചത് നടനും സംവിധായകനുമായ ബാലചന്ദ്രമേനോൻ്റെ ഏറ്റവും പുതിയ വെളിപ്പെടുത്തലാണ്. 1997ൽ താൻ സംവിധാനം ചെയ്ത സമാന്തരങ്ങൾ എന്ന സിനിമക്ക് നിശ്ചയിച്ച മൂന്ന് അവാർഡുകൾ മലയാളിയായ ഒരു ജൂറിയംഗം അട്ടിമറിച്ചെന്നും ഇതിനൊപ്പം തനിക്ക് നിശ്ചയിച്ച നടനുള്ള പുരസ്കാരം സുരേഷ് ഗോപിക്കും കൂടി നൽകാൻ തീരുമാനിച്ചെന്നും ആണ് മേനോൻ വെളിപ്പെടുത്തിയത്. വെറുതെ പറയുക മാത്രമല്ല അന്നത്തെ ജൂറിയിലെ മറ്റൊരു അംഗം ഇക്കാര്യങ്ങൾ തന്നോട് പറഞ്ഞതിൻ്റെ വീഡിയോ കൂടി പുറത്തുവിട്ടു. ഇതാണ് ആരോപണത്തിന് വിശ്വാസ്യതയുണ്ടാക്കിയത്.

ഇതിന് പിന്നാലെയാണ് വിദ്യാഭ്യാസമന്ത്രി വി.ശിവൻകുട്ടി കേന്ദ്രമന്ത്രി സുരേഷ് ഗോപിക്കെതിരെ നേരത്തെ നടത്തിയൊരു പ്രസ്താവന ചർച്ചയിലേക്ക് വരുന്നത്. ഇടുക്കി വട്ടവടയില്‍ നടന്ന കലുങ്ക് സംവാദത്തിനിടെ, കേരളത്തിന് നല്ല വിദ്യാഭ്യാസമുള്ള വിദ്യാഭ്യാസമന്ത്രി വരട്ടെ എന്ന് സുരേഷ് ഗോപി പരിഹസിച്ചിരുന്നു. ഇതിന് ശിവന്‍കുട്ടി നൽകിയ മറുപടിയാണ് ഇങ്ങനെയായിരുന്നു: “സുരേഷ് ഗോപി അഭിനയിക്കാന്‍ അറിയുന്ന ആളല്ല, ഇനി അഭിനയിച്ചാൽ എട്ടുനിലയിൽ പൊട്ടും, അയാൾക്ക് ദേശീയ തലത്തിൽ ഒരു പുരസ്‌കാരം ലഭിച്ചിട്ടുണ്ട്, അതെങ്ങനെ കിട്ടിയെന്ന് എനിക്കറിയാം, തൽക്കാലം ഞാനത് പറയുന്നില്ല”

Also Read: കെആർ മോഹനൻ ഇടപെട്ട് 1997ലെ ദേശീയ സിനിമാ അവാർഡ് അട്ടിമറിച്ചു!! തനിക്കുള്ള 3 അവാർഡ് ഇല്ലാതാക്കിയെന്ന് തെളിവുസഹിതം ബാലചന്ദ്രമേനോൻ

ശിവൻകുട്ടിയുടെ വാക്കുകൾ അന്നാരും ഗൌരവത്തിൽ എടുത്തില്ലെങ്കിലും മേനോൻ്റെ പുതിയ വെളിപ്പെടുത്തൽ അതിനെ വീണ്ടും ചർച്ചയിലേക്ക് കൊണ്ടുവരികയാണ്. മികച്ച നടനായി താൻ മാത്രമായിരുന്നു തിരഞ്ഞെടുക്കപ്പെട്ടത്, ‘കളിയാട്ട‘ത്തിലെ അഭിനയത്തിന് സുരേഷ് ഗോപിക്ക് കൂടി അവാർഡ് നൽകാൻ അവസാനഘട്ടത്തിൽ ജൂറി തീരുമാനിക്കുകയായിരുന്നു എന്നാണ് ജൂറി അംഗമായിരുന്ന ദേവേന്ദ്ര ഖണ്ഡേൽവാളിൻ്റെ വാക്കുകൾ കേൾപ്പിച്ച് മേനോൻ വെളിപ്പെടുത്തിയത്. തന്റെ സിനിമാ ജീവിതത്തിൻ്റെ അമ്പതാം വാർഷികാഘോഷ ചടങ്ങിലാണ് ബാലചചന്ദ്ര മേനോനാണ് ദേശീയ അവാർഡിലെ അട്ടിമറി തുറന്നുപറഞ്ഞത്.

ഇക്കാര്യം താനിതുവരെ രഹസ്യമാക്കി വച്ചിരിക്കുകയായിരുന്നു എന്ന് മേനോൻ ചടങ്ങിൽ പറഞ്ഞെങ്കിലും വി.ശിവൻകുട്ടിയോട് പറഞ്ഞിരുന്നോ എന്നാണ് സ്വാഭാവികമായും ഉയരുന്ന സംശയം. ബി സരോജാ ദേവി അധ്യക്ഷയായ ജൂറിയിലെ 13മ അംഗങ്ങളിൽ ഏക മലയാളിയായിരുന്നു കെആർ മോഹനൻ. പേര് പറഞ്ഞില്ലെങ്കിലും ജൂറിയിലെ മലയാളിയാണ് അവാർഡ് അട്ടിമറിച്ചതിന് പിന്നിലെന്ന് മേനോൻ പറയുമ്പോൾ മോഹനനെ തന്നെയാണ് പ്രതിസ്ഥാനത്ത് നിർത്തുന്നതെന്ന് വ്യക്തം. ഒപ്പം സുരേഷ് ഗോപിക്കും വല്ലാത്ത ക്ഷീണമാണ് മൂന്നു പതിറ്റാണ്ടിന് ശേഷം ബാലചന്ദ്രമേനോൻ നടത്തിയ വെളിപ്പെടുത്തൽ ഉണ്ടാക്കുന്നത്.