നടിയെ ആക്രമിച്ച കേസിലെ മൂന്നാം പ്രതി ആത്മഹത്യക്ക് ശ്രമിച്ചു; ഞരമ്പ് അറുത്തത് വിധി പ്രഖ്യാപനം വരാനിരിക്കെ

നടിയെ ആക്രമിച്ച കേസിൽ അന്തിമവിധി പ്രഖ്യാപനം അടുത്തിരിക്കെ, കേസിലെ മൂന്നാം പ്രതി മണികണ്ഠൻ ജീവനൊടുക്കാൻ ശ്രമിച്ചു. കൈ ഞരമ്പ് മുറിച്ച നിലയിൽ കണ്ടെത്തിയ മണികണ്ഠനെ ആശുപത്രിയിൽ എത്തിച്ച് ചികിത്സ നൽകി. ഇന്ന് പുലർച്ചെ മദ്യലഹരിയിലാണ് മണികണ്ഠൻ ആത്മഹത്യാശ്രമം നടത്തിയത്.

മദ്യപിച്ച് പ്രശ്‌നമുണ്ടാക്കിയതിനെ തുടർന്ന് പാലാരിവട്ടം പോലീസ് ഇയാളെ കസ്റ്റഡിയിലെടുത്തിരുന്നു. അറസ്റ്റ് രേഖപ്പെടുത്തിയ ശേഷം വിട്ടയച്ചതിന് പിന്നാലെയാണ് അടുത്തുള്ള കടയിൽ നിന്ന് ബ്ലേഡ് വാങ്ങി ഞരമ്പ് മുറിച്ചത്.

Also Read : ഡിസംബർ 8 ദിലീപിന് നിർണായകം!! നടിയെ ആക്രമിച്ച കേസ് വിധി വരുന്നു

ഇയാൾക്ക് ഉടൻ തന്നെ ആശുപത്രിയിൽ ചികിത്സ ലഭ്യമാക്കി. പ്രാഥമിക ചികിത്സയ്ക്ക് ശേഷം മണികണ്ഠനെ വീട്ടിലേക്ക് വിട്ടു. ഇയാൾ നിരന്തരം മദ്യപിച്ച് പ്രശ്നങ്ങളുണ്ടാക്കുന്ന സ്വഭാവക്കാരനാണെന്ന് പോലീസ് അറിയിച്ചു. നടിയെ ആക്രമിച്ച കേസിൽ ഡിസംബർ 8-ന് വിധി പറയാനിരിക്കെയാണ് മൂന്നാം പ്രതിയുടെ ഭാഗത്തുനിന്ന് ഇത്തരമൊരു ശ്രമം ഉണ്ടായത്.

ക്വട്ടേഷൻ പ്രകാരം നടിയെ തട്ടിക്കൊണ്ടുപോയി അപകീർത്തികരമായ ദൃശ്യങ്ങൾ പകർത്തി പീഡിപ്പിച്ചുവെന്നാണ് കേസ്. ഒന്നാം പ്രതി പൾസർ സുനിയും എട്ടാം പ്രതി ദിലീപും ഉൾപ്പെടെ ആകെ ഒമ്പത് പ്രതികളാണ് കേസിൽ വിചാരണ നേരിട്ടത്. ഡിസംബർ എട്ടിനാണ് കേസിൽ അന്തിമവിധി. എല്ലാ പ്രതികളും അന്ന് ഹാജരാകണം. എറണാകുളം പ്രിൻസിപ്പൽ സെഷൻസ് കോടതിയിലാണ് കേസ്.