പിണറായി വിജയനെ വെല്ലുവിളിച്ച് അമിത് ഷാ; കമ്മ്യൂണിസം കേരളത്തിന്റെ വളർച്ചയെ തടഞ്ഞെന്ന് ആരോപണം

വികസനത്തിന് പണമനുവദിക്കാതെ കേന്ദ്രം ഞെരുക്കുന്നുവെന്ന ആരോപണത്തിൽ തിരിച്ചടിച്ച് അമിത് ഷാ. ദുരന്ത നിവാരണ ഫണ്ട് വിനിയോഗവുമായി ബന്ധപ്പെട്ട് മുഖ്യമന്ത്രി പിണറായി വിജയനെ സംവാദത്തിന് ക്ഷണിച്ച് കേന്ദ്ര ആഭ്യന്തര മന്ത്രി. ഇതുവരെ 1300 കോടിയോളം രൂപയാണ് കേരളത്തിന് അനുവദിച്ചത്. അത് വേണ്ട രീതിയിൽ പ്രയോജനപ്പെടുത്തുന്നതിൽ കേരള സർക്കാർ പരാജയപ്പെട്ടു എന്നാണ് അമിത് ഷായുടെ ആരോപണം. മനോരമ ന്യൂസ് കോൺക്ലേവിൽ പങ്കെടുത്ത് സംസാരിക്കുകയായിരുന്നു അമിത് ഷാ.

Also Read : പാകിസ്ഥാനികളെ ചികഞ്ഞെടുത്ത് പുറത്താക്കണം; മുഖ്യമന്ത്രിമാര്‍ക്ക് നിര്‍ദേശം നല്‍കി അമിത് ഷാ

മോദിയുടെ 11 വർഷത്തെ ഭരണം ഇന്ത്യയുടെ സുവർണ്ണ കാലഘട്ടമാണ്. ഇന്ത്യ മുന്നോട്ട് കുതിക്കുമ്പോഴും 11 വർഷം മുമ്പ് എവിടെയായിരുന്നോ അവിടെ തന്നെയാണ് കേരളം ഇപ്പോഴും എന്നതിൽ ഖേദമുണ്ടെന്ന് അമിത് ഷാ പറഞ്ഞു. ഒരുപാട് സാധ്യതകളുള്ള കേരളത്തിൽ കമ്മ്യൂണിസ്റ്റ് പ്രത്യയശാസ്ത്രം വലിയ സ്തംഭനാവസ്ഥയാണ് ഉണ്ടാക്കുന്നത്. വരും വർഷങ്ങളിൽ വോട്ടവകാശം വിനിയോഗിച്ച് കേരളത്തിലെ ജനങ്ങളും രാജ്യത്തിന്റെ വികസന യാത്രയിൽ പങ്കാളികളാകുമെന്ന് പ്രതീക്ഷിക്കുന്നതായും അദ്ദേഹം കൂട്ടിച്ചേർത്തു.