ദിവ്യഗര്‍ഭം വാഗ്ദാനം ചെയ്ത് പീഡനം; വ്യാജ ഇമാം അറസ്റ്റിൽ

ദിവ്യഗര്‍ഭം വാഗ്ദാനം ചെയ്ത് യുവതിയെ ബലാത്സംഗം ചെയ്ത കേസിൽ വ്യാജ സിദ്ധൻ അറസ്റ്റിൽ. മിറാക്കിള്‍ പാത്ത് എന്ന യൂട്യൂബ് ചാനലിന്റെ ഉടമയായ സജില്‍ ചെറുപാണക്കാട് എന്നയാളെയാണ് പൊലീസ് കസ്റ്റഡിയിലെടുത്തത്. ഒളിവിലായിരുന്ന പ്രതിയെ നെടുമങ്ങാട് നിന്ന് കൊളത്തൂർ പൊലീസാണ് പിടികൂടിയത്.

യൂട്യൂബ് ചാനലിലൂടെ താൻ ഇമാമാണെന്ന വ്യാജേന ആത്മീയമായ വീഡിയോകൾ പോസ്റ്റ് ചെയ്തിരുന്ന സജിൽ ആഭിചാരക്രിയകൾ ചെയ്യുന്ന ആളാണെന്ന് വിശ്വസിപ്പിച്ചാണ് പരാതിക്കാരിയായ യുവതിയുമായി പരിചയത്തിലായത്. ദിവ്യഗര്‍ഭം ഉണ്ടാക്കിത്തരാമെന്ന് യുവതിക്ക് പ്രതി വാഗ്ദാനം ചെയ്തു. ആഭിചാരക്രിയ ചെയ്യാനെന്ന വ്യാജേന യുവതിയുടെ വാടക വീട്ടിലെത്തിയ പ്രതി, യുവതിയെ അതിക്രമിച്ച് കയറി പീഡിപ്പിക്കുകയായിരുന്നു.

സംഭവത്തിൽ വിശദമായ അന്വേഷണം ആരംഭിച്ചതായി പൊലീസ് അറിയിച്ചു. പ്രതിക്കെതിരെ കൂടുതൽ പരാതികൾ ഉണ്ടാകാൻ സാധ്യതയുണ്ടെന്നും പൊലീസ് കൂട്ടിച്ചേർത്തു. ഇയാൾക്കെതിരേ സമാന കേസുകൾ വേറെയുമുണ്ടെന്നാണ് പോലീസ് വ്യക്തമാക്കുന്നത്. നിരവധി സ്ത്രീകൾ ഇയാൾക്കെതിരേ പരാതിയുമായി രംഗത്തുവന്നതായാണ് വിവരം.