കള്ളുഷാപ്പുകൾക്ക് സ്റ്റാർ റേറ്റിങ് വരുന്നു; കുട്ടികൾക്ക് പാർക്ക് അടക്കം സൗകര്യങ്ങളും

പഞ്ചനക്ഷത്ര ബാറുകളൊക്കെ സംസ്ഥാനത്ത് നിലവിലുണ്ട്. അതേ പേരിൽ കള്ളുഷാപ്പുകളും ഉണ്ട്. എന്നാൽ കൃത്യമായും സ്റ്റാർ റേറ്റിങ്ങോടെ തന്നെ ഫോർ സ്റ്റാർ, ഫൈവ് സ്റ്റാർ ഷാപ്പുകൾ വരികയാണ്. ഇവക്കുള്ള സ്ഥലസൗകര്യത്തിനായി താൽപര്യപത്രം ക്ഷണിച്ചു. സ്വന്തമായി സ്ഥലം ഉള്ളവർക്കോ, പാട്ടത്തിന് എടുത്തവർക്കോ ഇതിനായി അപേക്ഷിക്കാം. കള്ള് കുപ്പിയിലാക്കി വിൽക്കുന്നതുമായി ബന്ധപ്പെട്ട ചർച്ചകളും ടോഡി ബോർഡ് നടത്തിവരികയാണ്.

ടൂറിസം മേഖലകളിലാണ് ഷാപ്പുകൾ വരുന്നത്. റസ്റ്ററന്റും കള്ളുഷാപ്പും രണ്ടായി പ്രവർത്തിക്കണം. ഓരോന്നിലേക്കും പ്രത്യേക വഴികളും വേണം. ശുചിമുറി, കുട്ടികൾക്കുള്ള പാർക്ക് എന്നിവയും ഉണ്ടാകും. ബോർഡ് നിശ്ചയിക്കുന്ന രീതിയിലാകണം ഭക്ഷണക്രമം. അബ്കാരി ചട്ടപ്രകാരം ഷാപ്പ് നടത്താനുള്ള തെങ്ങുകൾ വേണം. തെങ്ങ് ഇല്ലെങ്കിൽ മറ്റിടങ്ങളിൽ നിന്ന് ബോർഡ് ഇടപെട്ട് കള്ള് എത്തിക്കും.

ടോഡി ബോർഡിൻ്റെ പരിശോധനകൾക്ക് ശേഷമാകും സ്റ്റാർ പദവി നൽകുക. ആറു വർഷത്തേക്കാണ് ഇത്. തൊഴിലാളികളെ ആവശ്യമെങ്കിൽ കള്ള് ചെത്താനുള്ള പരിശീലനവും ബോർഡ് നൽകുന്നതാണ്. സെപ്റ്റംബര്‍ 30വരെ അപേക്ഷ നൽകാം. കള്ള് കേടുകൂടാതെ കുപ്പിയിലാക്കി സ്റ്റോറുകൾ വഴി വില്പന നടത്തുകയാണ് ടോഡി ബോർഡിന്റെ അടുത്ത ലക്ഷ്യമെന്നും ടോഡി ബോർഡ് ചെയർമാൻ യു.പി.ജോസഫ് ഏഷ്യാനെറ്റ് ന്യൂസിനോടാണ് പറഞ്ഞത്.