സ്വപ്ന സുരേഷ് വീണ്ടും CPMന് തലവേദനയാകുമോ? പരാതിയുമായി കോൺഗ്രസ് നേതാവ്

മുൻ മന്ത്രിയായ കടകംപള്ളി സുരേന്ദ്രനെതിരെ സ്വപ്‌ന സുരേഷിൻ്റെ വെളിപ്പെടുത്തലിൻ്റെ അടിസ്ഥാനത്തിൽ കേസെടുക്കണമെന്ന് കോൺഗ്രസ് നേതാവിൻ്റെ പരാതി. എം മുനീറാണ് ഡിജിപിക്ക് പരാതി നൽകിയത്. മുൻ മന്ത്രി മോശമായി സംസാരിക്കുകയും സമീപ്പിക്കുകയും ചെയ്‌തുവെന്നായിരുന്നു സ്വപ്‌നസുരേഷിൻ്റെ വെളിപ്പെടുത്തൽ. ഈ വെളിപ്പെടുത്തലിന്റെ അടിസ്ഥാനത്തിൽ കേസെടുക്കണമെന്നാണ് പരാതിക്കാരൻ്റെ ആവശ്യം. കടകംപള്ളിക്കെതിരെ വെളിപ്പെടുത്തൽ നടത്തിയ സ്ത്രീകളെ കണ്ടെത്തി അവരുടെ മൊഴി രേഖപ്പെടുത്തി കേസെടുക്കണമെന്ന് പരാതിയിൽ പറയുന്നു.

രാഹുല്‍ മാങ്കൂട്ടത്തിലിന് എതിരെ സ്വമേധയാ കേസെടുത്ത് അന്വേഷണം ആരംഭിച്ച പൊലീസിന് ഇതുവരെ പരാതിക്കാരെ കണ്ടെത്താൻ പോലും കഴിഞ്ഞിട്ടില്ല. സിപിഎമ്മിനെ സ്വപ്ന സുരേഷിന്റെ വെളിപ്പെടുത്തൽ ഉപയോഗിച്ചുകൊണ്ട് പ്രതിരോധിക്കാനുള്ള തയ്യാറെടുപ്പിലാണ് കോൺഗ്രസ്. രാഹുലിനെതിരെ പ്രത്യേക അന്വേഷണ സംഘം കേസുമായി മുന്നോട്ട് പോവുന്നതിനിടെയാണ് സിപിഎം നേതാവിനെതിരെ സമാനമായ പരാതിയുമായി കോൺഗ്രസ് നേതാവും രംഗത്തെത്തുന്നത്. നിലവിൽ രാഹുലിനെതിരെ ആരോപണം നടത്തിയ യുവതികളാരും പരാതി നൽകിയിട്ടില്ല.