ആധാർ പുതുക്കാനുള്ള സമയപരിധി വീണ്ടും നീട്ടി; മാർച്ച് 14 വരെ സൗജന്യമായി പുതുക്കാം

തിരുവനന്തപുരം: ആധാർ കാർഡിൽ സൗജന്യമായി മാറ്റങ്ങൾ വരുത്താനുള്ള തീയതി 2024, മാർച്ച് 14 വരെ നീട്ടി. ഓൺലൈൻ വഴി സ്വന്തമായി, ആധാറിലെ വിവരങ്ങൾ പുതുക്കാനുള്ള സമയപരിധി നാളെ അവസാനിക്കാനിരിക്കെയാണ് തീയതി നീട്ടിയതായി UIDAI അറിയിച്ചത്. മൈ ആധാർ പോർട്ടൽ വഴി സൗജന്യമായി വിവരങ്ങൾ പുതുക്കാനുള്ള പരിധിയാണ് മാർച്ച് 14. ആധാർ കേന്ദ്രങ്ങൾ വഴിയോ അക്ഷയ കേന്ദ്രങ്ങൾ വഴിയോ പുതുക്കുന്നതിന് 50 രൂപ ഫീസ് ഈടാക്കും. മാർച്ച് 14 ന് ശേഷം ഓൺലൈൻ പോർട്ടൽ മുഖേന നേരിട്ട് വിവരങ്ങൾ പുതുക്കാൻ ഫീസ് ഈടാക്കുമോയെന്ന് വ്യക്തമല്ല.

പേര്, വിലാസം, ലിംഗം, ജനന തീയതി, ഫോൺ നമ്പർ, ഇമെയിൽ ഐഡി എന്നിവയാണ് പോർട്ടൽ വഴി സ്വന്തമായി പുതുക്കാൻ കഴിയുന്നത്. ബയോമെട്രിക്ക് വിവരങ്ങളും, ഫോട്ടോയും സ്വന്തമായി മാറ്റാൻ കഴിയില്ല.

പോർട്ടൽ മുഖേന പുതുക്കുന്നത് എങ്ങനെ?

1) UIDAI യുടെ ഔദ്യോഗിക വെബ്സൈറ്റായ myaadhaar.uidai.gov.in സന്ദർശിക്കുക.

2) ആധാർ നമ്പർ നൽകുമ്പോൾ രജിസ്റ്റർ ചെയ്ത മൊബൈൽ നമ്പറിൽ ഒടിപി ലഭിക്കും.

3) ഒടിപി നൽകി ലോഗിൻ ചെയ്ത ശേഷം നിർദ്ദേശങ്ങൾ മനസിലാക്കുക.

4) അതിനു ശേഷം ഡോക്യുമെന്റ് അപ്ഡേറ്റ് ഓപ്ഷൻ ക്ലിക്ക് ചെയ്യണം.

5) പേര്, മേൽവിലാസം തുടങ്ങി ഏതാണോ മാറ്റം വരുത്തേണ്ടത് അത് തിരഞ്ഞെടുക്കുക.

6) മാറ്റം വരുത്തേണ്ട രേഖകളും അനുബന്ധ വിവരങ്ങളും നൽകി കഴിയുമ്പോൾ സബ്മിറ്റ് ഓപ്ഷൻ നൽകണം.

തുടർന്ന് URN അഥവാ അപ്ഡേറ്റ് റിക്വസ്റ്റ് നമ്പർ ലഭിക്കും. സമർപ്പിച്ച അപേക്ഷ സ്വീകരിച്ചോ ഇല്ലയോ എന്നത് ഈ നമ്പർ ഉപയോഗിച്ച് അറിയാൻ സാധിക്കും. സമർപ്പിച്ച അപേക്ഷയെക്കുറിച്ചുള്ള വിശദാംശങ്ങള്‍ രജിസ്റ്റർ ചെയ്ത മൊബൈൽ നമ്പറിൽ ലഭിക്കും.