അടുത്ത മൂന്ന് മണിക്കൂര്‍ ശക്തമായ മഴ; 50 കിലോമീറ്റര്‍ വരെ വേഗതയില്‍ കാറ്റും വീശാം

കേരളത്തിലെ തെക്കന്‍ ജില്ലകള്‍ ശക്തമായ മഴ തുടരുന്നു. അടുത്ത മൂന്ന് മണിക്കൂര്‍ ശക്തമായ മഴ ലഭിക്കുമെന്നാണ് മുന്നറിയിപ്പ്. തിരുവനന്തപുരം, കൊല്ലം, പത്തനംതിട്ട ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു. ഒറ്റപ്പെട്ടയിടങ്ങളില്‍ ഇടിമിന്നലോട് കൂടിയ ശക്തമായ മഴയ്ക്കാണ് സാധ്യത. മണിക്കൂറില്‍ 50 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

പല ജില്ലകളിലും മഴ ലഭിക്കുന്നുണ്ടെങ്കിലും സംസ്ഥാനത്ത് തുലാവര്‍ഷമെത്തിയിട്ടില്ലെന്നാണ് കാലാവസ്ഥാവകുപ്പ് അറിയിച്ചിരിക്കുന്നത്. 2 മണിക്കൂറിനുള്ളില്‍ കാലവര്‍ഷം പിന്‍വാങ്ങുകയും തുലാവര്‍ഷം എത്തുമെന്നുമാണ് കണക്കാക്കുന്നത്. അറബിക്കടലില്‍ ലക്ഷദ്വീപ് പ്രദേശങ്ങള്‍ക്കു മുകളില്‍ ചക്രവാതച്ചുഴി രൂപപ്പെട്ടിട്ടുണ്ട്. അതാണ് തെക്കന്‍ കേരളത്തില്‍ മഴ സജീവമാകാന്‍ കാരണം.

ഇന്ന് കോട്ടയം, ഇടുക്കി ജില്ലകളില്‍ ഓറഞ്ച് അലര്‍ട്ട് നേരത്തെ തന്നെ പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, തൃശൂര്‍, മലപ്പുറം ജില്ലകളില്‍ യെലോ അലര്‍ട്ടാണ്.