32 സെക്കൻഡ് പവർ കട്ട് തോൽപ്പിച്ചു; കോടതി ജയിപ്പിച്ചു; നർത്തകിക്ക് തൃശൂരിലെ സംസ്ഥാന വേദിയിൽ അവസരം

ജില്ലാ കലോത്സവത്തിനിടെയുണ്ടായ വൈദ്യുതി തടസ്സം തകർത്ത ഒരു കൗമാര നർത്തകിയുടെ സ്വപ്നങ്ങൾക്ക് കേരള ഹൈക്കോടതിയുടെ തുണ. തിരുവനന്തപുരം ജില്ലാ സ്കൂൾ കലോത്സവത്തിൽ കുച്ചിപ്പുടി മത്സരത്തിനിടെ പവർ കട്ട് ഉണ്ടായതിനെത്തുടർന്ന് അഞ്ചാം സ്ഥാനത്തേക്ക് പിന്തള്ളപ്പെട്ട 16-കാരിക്ക് സംസ്ഥാന സ്കൂൾ കലോത്സവത്തിൽ പങ്കെടുക്കാൻ ഹൈക്കോടതി അനുമതി നൽകി.

തിരുവനന്തപുരം ജില്ലാ കലോത്സവത്തിൽ എച്ച്.എസ്.എസ് ജനറൽ വിഭാഗം കുച്ചിപ്പുടി മത്സരത്തിനിടെയായിരുന്നു സംഭവം. കുട്ടി നൃത്തം ചെയ്തുകൊണ്ടിരിക്കെ സ്റ്റേജിലെ ലൈറ്റുകളും സൗണ്ട് സിസ്റ്റവും പണിമുടക്കി. ഏകദേശം 32 സെക്കൻഡോളം വൈദ്യുതി ഉണ്ടായിരുന്നില്ല. പാട്ടും വെളിച്ചവുമില്ലാതെയും കുട്ടി തന്റെ പ്രകടനം തുടർന്നെങ്കിലും, ഈ സാങ്കേതിക തകരാർ കുട്ടിയുടെ ആത്മവിശ്വാസത്തെ ബാധിച്ചിട്ടുണ്ടാകാമെന്ന് ജസ്റ്റിസ് ബെച്ചു കുര്യൻ തോമസ് നിരീക്ഷിച്ചു.

Also Read : വിദ്യാർത്ഥികൾക്ക് ഹാപ്പി ന്യൂസ്; കലോത്സവത്തിൽ ‘A’ ഗ്രേഡ് നേടുന്നവർക്ക് ക്യാഷ് പ്രൈസ്

മത്സരശേഷം അപ്പീൽ നൽകിയെങ്കിലും വിദ്യാഭ്യാസ വകുപ്പ് അത് തള്ളിയിരുന്നു. 32 സെക്കൻഡ് നേരത്തെ വൈദ്യുതി തടസ്സം പ്രകടനത്തെ ബാധിച്ചിട്ടില്ലെന്നായിരുന്നു വകുപ്പിന്റെ വാദം. ഇതിനെതിരെയാണ് നർത്തകി ഹൈക്കോടതിയെ സമീപിച്ചത്. വിദ്യാഭ്യാസ വകുപ്പിന്റെ വാദങ്ങൾ തള്ളിക്കൊണ്ട് കോടതി കുട്ടിക്കൊപ്പം നിന്നു. മറ്റു മത്സരാർത്ഥികൾക്ക് ലഭിച്ച തുല്യമായ സാഹചര്യം ഈ നർത്തകിക്ക് ലഭിച്ചില്ലെന്ന് കോടതി വിലയിരുത്തി. “വൈദ്യുതി പോയപ്പോഴും നൃത്തം തുടരാൻ കുട്ടി ശ്രമിച്ചെങ്കിലും, ആ സാഹചര്യം ഒരു മത്സരാർത്ഥിയുടെ ആത്മവിശ്വാസത്തെയും ഒഴുക്കിനെയും ബാധിക്കും. അത് കുട്ടിയെ മറ്റു കുട്ടികളിൽ നിന്ന് അസമമായ ഒരു സ്ഥാനത്തേക്ക് എത്തിച്ചു,” എന്ന് കോടതി നിരീക്ഷിച്ചു.

കുട്ടിക്ക് രണ്ടാമതൊരു അവസരം നൽകാൻ അധികൃതർ തയ്യാറാകാതിരുന്നതും കോടതി ഗൗരവത്തോടെ കണ്ടു. തുടർന്നാണ് വിദ്യാഭ്യാസ വകുപ്പിന്റെ ഉത്തരവ് റദ്ദാക്കിക്കൊണ്ട്, ഇന്ന് തുടങ്ങുന്ന സംസ്ഥാന സ്കൂൾ കലോത്സവത്തിൽ പങ്കെടുക്കാൻ നർത്തകിക്ക് കോടതി അനുമതി നൽകിയത്. സാങ്കേതിക തകരാറുകൾ മൂലം കുട്ടികളുടെ കഠിനാധ്വാനം പാഴായിപ്പോകരുത് എന്ന സന്ദേശമാണ് ഈ വിധി നൽകുന്നത്. ഇന്ന് തൃശൂരിൽ നടക്കുന്ന സംസ്ഥാന കലോത്സവ വേദിയിൽ ഈ നർത്തകി കുച്ചിപ്പുടി അവതരിപ്പിക്കും.