ഒന്നാംതീയതി സാധനം കിട്ടും!! സ്റ്റാർ ഹോട്ടലിൽ പോകേണ്ടിവരും; മദ്യപരോട് വീണ്ടും ഉദാരമായി പിണറായി സർക്കാർ

ത്രീ സ്റ്റാര്‍, ഫോര്‍ സ്റ്റാര്‍, ഫൈവ് സ്റ്റാര്‍ ഹോട്ടലുകള്‍ക്ക് ഒന്നാം തീയതികളിൽ മദ്യം വിളമ്പാന്‍ അനുമതി നൽകി വിദേശമദ്യ ചട്ടം ഭേദഗതി ചെയ്ത് സര്‍ക്കാര്‍. ടൂറിസം മേഖലയെ പരിപോഷിപ്പിക്കാനാണ് ഭേദഗതി നീക്കമെന്ന് സർക്കാർ വിശദീകരണം. ഓർഡർ പുറത്തിറങ്ങിയതിനാൽ അടുത്ത മാസം ഒന്ന് മുതൽ സ്റ്റാർ ഹോട്ടലുകളിൽ മദ്യം കിട്ടും.

സ്റ്റാർ ഹോട്ടലുകള്‍ക്ക് പുറമെ ഹെറിറ്റേജ്, ഹെറിറ്റേജ് ഗ്രാന്റ്, ഹെറിറ്റേജ് ക്ലാസിക് എന്നീ ഗണത്തില്‍പ്പെടുന്ന ഹോട്ടലുകള്‍ക്കും ഒന്നാം തീയതി ഇനി ഇളവുണ്ട്. ആഘോഷങ്ങൾക്കും മറ്റ് മീറ്റിംഗുകൾക്കും ഒന്നാം തീയതി മദ്യം വിളമ്പാന്‍ 50,000 രൂപ ഫീസ് നല്‍കി ലൈസന്‍സ് എടുക്കണം. അനുമതി ലഭിക്കാൻ ഒരാഴ്ച മുമ്പ് എക്‌സൈസ് കമ്മീഷണര്‍ക്ക് അപേക്ഷ നല്‍കണം.

ടൂറിസം മേഖലയുടെ വളർച്ച ലക്ഷ്യം വച്ചുകൊണ്ടാണ് ഇത്തരം നടപടികളെന്നാണ് മന്ത്രി എം ബി രാജേഷ് പറയുന്നത്. ടൂറിസം മേഖലകളിൽ ടോഡി പാര്‍ലറുകള്‍ തുറക്കും. ത്രീസ്റ്റാറിന് മുകളിലുള്ള ഹോട്ടലുകള്‍ക്കാണ് ഇതിനായുള്ള അനുമതി നല്‍കുകയെന്നും മന്ത്രി നേരത്തെ വ്യക്തമാക്കിയിരുന്നു.