ഇന്ത്യാസഖ്യം തകരുന്നോ? ആം ആദ്മിയുടെ പിന്മാറ്റം ബിജെപിക്ക് വൻ നേട്ടമാകും

തുടർഭരണങ്ങൾ നേടി ജൈത്രയാത്ര തുടരുന്ന ബിജെപിക്കെതിരെ പ്രതിരോധത്തിന് പ്രതിപക്ഷ പാർട്ടികൾ ചേർന്ന് രൂപീകരിച്ച ഇന്ത്യ മുന്നണിയ്ക്ക് വൻ തിരിച്ചടി നൽകി ആം ആദ്മി പാർട്ടിയുടെ നീക്കം. അരവിന്ദ് കെജ്രിവാളിൻ്റെ നേതൃത്വത്തിൽ പാർട്ടി, സഖ്യത്തിൽ നിന്ന് പുറത്തുപോയതായും, പാർലമെൻ്റിൻ്റെ വരാനിരിക്കുന്ന മൺസൂൺ സമ്മേളനത്തിന് മുന്നോടിയായുള്ള പ്രതിപക്ഷ യോഗത്തിൽ പങ്കെടുക്കില്ലെന്നും മുതിർന്ന ആപ് നേതാവ് സഞ്ജയ് സിംഗാണ് വെളിപ്പെടുത്തിയത്.

Also Read : ആം ആദ്മിയെ തകർക്കുന്നത് അധികാരമോഹമോ? വലവിരിച്ച് ബിജെപി; കെജ്‌രിവാളിൻ്റെ വിശ്വസ്തൻ്റെ രാജിക്ക് പിന്നിൽ…

മുന്നണിപ്രവേശം ആം ആദ്മിയുടെ രാഷ്ട്രീയ അസ്ഥിത്വം ഇല്ലാതാക്കിയെന്ന വിലയിരുത്തലിലാണ് പുതിയ നീക്കം. പാർട്ടിയുടെ ശക്തികേന്ദ്രമായിരുന്ന ഡൽഹിയിലെ നിയമസഭാ തിരഞ്ഞെടുപ്പുകളിലെ തിരിച്ചടിയാണ് പാർട്ടിയെ മാറി ചിന്തിക്കാൻ പ്രേരിപ്പിച്ചത്. ഡൽഹി പരാജയത്തിന് ശേഷം പഞ്ചാബിലും ഗുജറാത്തിലും നടന്ന രണ്ട് നിർണായക നിയമസഭാ ഉപതിരഞ്ഞെടുപ്പുകളിൽ ഒറ്റക്ക് മത്സരിച്ച് വിജയം നേടി ആം ആദ്മി വലിയ തിരിച്ചുവരവ് നടത്തിയിരുന്നു.

പഞ്ചാബിൽ, ആംആദ്മി കോൺഗ്രസിനെ പരാജയപ്പെടുത്തി ലുധിയാന വെസ്റ്റ് സീറ്റ് നേടി, ഗുജറാത്തിൽ രണ്ട് പതിറ്റാണ്ടിലേറെയായി സംസ്ഥാനത്ത് അധികാരത്തിലുള്ള ബിജെപിയെ പരാജയപ്പെടുത്തി വിസവദർ മണ്ഡലത്തിൽ ശ്രദ്ധേയമായ വിജയം നേടി. ഇതെല്ലാം കണക്കിലെടുത്താണ്, ബിജെപി ക്കും കോൺഗ്രസിനും എതിരായ ബദൽ ശക്തിയായി ആംആദ്മി പാർട്ടി നിലകൊള്ളണമെന്ന വാദങ്ങൾ പാർട്ടിക്കുള്ളിൽ ശക്തമായത്.

Also Read : കേരളത്തിലെ ഒരു മുൻ മന്ത്രി ആംആദ്മിയിലേക്ക്; ജനതാദൾ എസ് വിമതവിഭാഗവുമായി ലയനം ഉടനെന്ന് നേതൃത്വം

പഞ്ചാബിലും ഗുജറാത്തിലും 2027ൽ നിയമസഭാ തിരഞ്ഞെടുപ്പുകൾ വരുകയാണ്. കോൺഗ്രസ് നേതൃത്വം നൽകുന്ന ഇന്ത്യാമുന്നണിയിൽ നിന്നും പുറത്തു വരുന്ന ആംആദ്മി പാർട്ടി, ഈ സംസ്ഥാനങ്ങളിലെ കോൺഗ്രസ് വോട്ടുകളിൽ വിള്ളൽ ഉണ്ടാക്കുമെന്ന് ഉറപ്പാണ്. കോൺഗ്രസിന്റെ അടിസ്ഥാന വോട്ടുബാങ്ക് തന്നെ തട്ടിയെടുക്കാമെന്ന് ആം ആദ്മി കണക്കുകൂട്ടുന്നു.

ബിജെപിക്കെതിരായി വിശാല പ്രതിപക്ഷസഖ്യം രൂപീകരിച്ച കോൺഗ്രസിന് ഇത് വലിയ തിരിച്ചടിയാകും. കോൺഗ്രസ് വോട്ട് ബാങ്കിലുണ്ടാകുന്ന വിള്ളൽ സഹായിക്കുക ബിജെപി നേതൃത്വം നൽകുന്ന എൻഡിഎ സഖ്യത്തെ ആകുമെന്നും ഉറപ്പാണ്.