അമേരിക്കയോ വെനസ്വേലയോ? മഡുറോയുടെ അറസ്റ്റിൽ ഇന്ത്യയുടെ കരുതലോടെയുള്ള നീക്കം

വെനസ്വേലൻ പ്രസിഡന്റ് നിക്കോളാസ് മഡുറോയെ അമേരിക്കൻ സൈന്യം അറസ്റ്റ് ചെയ്ത് ന്യൂയോർക്കിലെത്തിച്ച സംഭവത്തിൽ ഔദ്യോഗിക പ്രതികരണവുമായി ഇന്ത്യ. വെനസ്വേലയിലെ പുതിയ സംഭവവികാസങ്ങളിൽ ഇന്ത്യ അതീവ ആശങ്ക രേഖപ്പെടുത്തി. എന്നാൽ, ഈ അസാധാരണ സൈനിക നീക്കം നടത്തിയ അമേരിക്കയെക്കുറിച്ച് ഔദ്യോഗിക പ്രസ്താവനയിൽ ഇന്ത്യ ഒരിടത്തും പരാമർശിച്ചിട്ടില്ല എന്നത് ശ്രദ്ധേയമാണ്.

കേന്ദ്ര വിദേശകാര്യ മന്ത്രാലയം പുറത്തിറക്കിയ പ്രസ്താവനയിൽ, വെനസ്വേലയിലെ നിലവിലെ സാഹചര്യങ്ങൾ സൂക്ഷ്മമായി നിരീക്ഷിച്ചു വരികയാണെന്ന് വ്യക്തമാക്കി. ഒരു രാജ്യത്തിന്റെ പരമാധികാരവും അന്താരാഷ്ട്ര നിയമങ്ങളും മാനിക്കപ്പെടണം എന്നതാണ് ഇന്ത്യയുടെ എക്കാലത്തെയും നിലപാട്. വെനസ്വേലയിലെ സമാധാനവും സുസ്ഥിരതയും ആ രാജ്യത്തെ ജനങ്ങളുടെ താൽപ്പര്യത്തിനനുസരിച്ചുള്ള ജനാധിപത്യ പ്രക്രിയയിലൂടെയാകണം ഉറപ്പാക്കേണ്ടതെന്ന് ഇന്ത്യൻ വിദേശകാര്യ വക്താവ് അറിയിച്ചു.

Also Read : ലോകത്തെ ഞെട്ടിച്ച അമേരിക്കൻ നീക്കം; നിക്കോളാസ് മഡുറോയും ഭാര്യയും യുഎസ് കോടതിയിൽ വിചാരണ നേരിടും

അമേരിക്കയുടെ പേര് ഒഴിവാക്കിയത് കൃത്യമായ നയതന്ത്ര നീക്കമായാണ് നിരീക്ഷകർ കാണുന്നത്. പ്രതിരോധ-സാങ്കേതിക മേഖലകളിൽ അമേരിക്കയുമായി ഇന്ത്യ പുലർത്തുന്ന അടുത്ത ബന്ധം നിലനിൽക്കെ, മഡുറോയുടെ അറസ്റ്റിനെ നേരിട്ട് വിമർശിക്കുന്നത് ഒഴിവാക്കാനാണ് ഇന്ത്യ ശ്രമിച്ചത്. അതേസമയം, വെനസ്വേലയുമായി ചരിത്രപരമായ നല്ല ബന്ധം പുലർത്തുന്ന ഇന്ത്യ, ഒരു ഭരണാധികാരിയെ മറ്റൊരു രാജ്യം ബലം പ്രയോഗിച്ച് പിടികൂടിയതിനെ അംഗീകരിക്കുന്നുമില്ല.

മഡുറോയുടെ അറസ്റ്റിനെതിരെ റഷ്യയും ചൈനയും കടുത്ത ഭാഷയിൽ അമേരിക്കയെ വിമർശിച്ചിരുന്നു. ഇത് അന്താരാഷ്ട്ര നിയമങ്ങളുടെ നഗ്നമായ ലംഘനമാണെന്നാണ് അവരുടെ വാദം. ഈ ഘട്ടത്തിലാണ് ഇന്ത്യ വളരെ കരുതലോടെയുള്ള നിലപാട് സ്വീകരിച്ചിരിക്കുന്നത്. വെനസ്വേലയുടെ ആഭ്യന്തര കാര്യങ്ങളിൽ പുറത്തുനിന്നുള്ള ഇടപെടലുകൾ പാടില്ലെന്ന സൂചന പ്രസ്താവനയിലുണ്ട്. മയക്കുമരുന്ന് കടത്ത് ആരോപിച്ചാണ് വെനസ്വേലൻ പ്രസിഡന്റ് നിക്കോളാസ് മഡുറോയെയും ഭാര്യയെയും യുഎസ് സൈന്യം കസ്റ്റഡിയിലെടുത്തത്. നിലവിൽ ന്യൂയോർക്കിലെ അതീവ സുരക്ഷയുള്ള ജയിലിലാണ് ഇരുവരും.