പാകിസ്ഥാൻ ആക്രമണം കടുക്കുമ്പോൾ സഹായവുമായി ഇന്ത്യ; അഫ്ഗാനിലേക്ക് എത്തിച്ചത് 73 ടൺ മരുന്നുകൾ

അഫ്ഗാനിസ്ഥാനെതിരെ പാകിസ്ഥാൻ അതിർത്തി കടന്നുള്ള വ്യോമാക്രമണങ്ങൾ നടത്തുന്നതിനിടെ, 73 ടൺ ജീവൻരക്ഷാ മരുന്നുകളും വാക്സിനുകളും മറ്റ് മാനുഷിക സഹായങ്ങളുമായി ഇന്ത്യ രംഗത്ത്. മൂന്ന് ദിവസം മുമ്പ് പാസ്ഥാൻ നടത്തിയ വ്യോമാക്രമണത്തിൽ 9 കുട്ടികളും ഒരു സ്ത്രീയും ഉൾപ്പെടെ 10 പേർ കൊല്ലപ്പെട്ട പശ്ചാത്തലത്തിലാണ് ഇന്ത്യ അടിയന്തര സഹായം നൽകിയത്. നിലവിൽ അഫ്ഗാൻ-പാക് ബന്ധം ചരിത്രത്തിലെ ഏറ്റവും മോശം അവസ്ഥയിലാണ്.

അഫ്ഗാനിസ്ഥാൻ്റെ വൈദ്യസഹായ ആവശ്യങ്ങൾ പരിഹരിക്കുന്നതിനാണ് ഈ മാനുഷിക സഹായം ലക്ഷ്യമിടുന്നതെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ അറിയിച്ചു. വെള്ളിയാഴ്ചയാണ് 73 ടൺ വരുന്ന സഹായം അഫ്ഗാനിസ്ഥാനിലേക്ക് അയച്ചത്. ഈ വർഷം മൂന്നാമത്തെ പ്രാവശ്യമാണ് ഇന്ത്യ അഫ്ഗാനിലേക്ക് സഹായം അയക്കുന്നത്.

Also Read : ഇന്ത്യാപേടിയിൽ പാകിസ്ഥാൻ; ഭയന്ന് വ്യോമാതിർത്തി പൂട്ടി

ഇന്ത്യ-അഫ്ഗാൻ ബന്ധം മെച്ചപ്പെടുത്തുന്നതിൻ്റെ ഭാഗമായുള്ള നടപടികളുടെ തുടർച്ചയായാണ് ഈ സഹായ വിതരണം. അടുത്തിടെ, പ്രമുഖ ഫാർമസ്യൂട്ടിക്കൽ കമ്പനികളായ സൈഡസ് ലൈഫ് സയൻസസും അഫ്ഗാനിസ്ഥാൻ്റെ റോഫീസ് ഇൻ്റർനാഷണൽ ഗ്രൂപ്പ് ഓഫ് കമ്പനീസും തമ്മിൽ 100 മില്യൺ ഡോളറിൻ്റെ ധാരണാപത്രം ഒപ്പുവെച്ചിരുന്നു. താലിബാൻ മന്ത്രി അൽഹാജ് നൂറുദ്ദീൻ അസീസി വ്യാപാര ബന്ധങ്ങൾ തേടി ഇന്ത്യ സന്ദർശനം പൂർത്തിയാക്കി ദിവസങ്ങൾക്കകമാണ് ഈ കരാർ എന്നതും ശ്രദ്ധേയമാണ്.

ഇന്ത്യ-അഫ്ഗാൻ ബന്ധം ഊഷ്മളമാകുന്നതിനിടെ, ദീർഘകാല സൗഹൃദം പുലർത്തിയിരുന്ന പാകിസ്ഥാനുമായുള്ള അഫ്ഗാൻ ബന്ധത്തിൽ വലിയ വിള്ളലുകളാണ് ഉടലെടുത്തത്. താലിബാൻ സർക്കാരിൻ്റെ മുഖ്യ വക്താവ് സബീഹുള്ള മുജാഹിദിന്റെ പ്രസ്താവന പ്രകാരം, നവംബർ 24-25 രാത്രിയിൽ പാക് യുദ്ധവിമാനങ്ങൾ അഫ്ഗാനിസ്ഥാൻ്റെ കിഴക്കൻ പ്രവിശ്യകളായ ഖോസ്ത്, കുനാർ, പക്തിക എന്നിവിടങ്ങളിലെ ലക്ഷ്യങ്ങൾക്കുനേരെ ആക്രമണം നടത്തി.