ഒരു ലക്ഷം കടന്നിട്ടും നിർത്താതെ കുതിപ്പ്; ഞെട്ടിച്ച് സ്വർണവില

സംസ്ഥാനത്ത് സ്വര്‍ണവിലയിൽ ഇന്നും വൻ കുതിപ്പ്. ഇന്ന് പവന് 880 രൂപയാണ് വർദ്ധിച്ചത്. ഇതോടെ ഒരു പവന്‍ സ്വര്‍ണത്തിന്റെ വില 1,03,560 രൂപ എന്ന റെക്കോർഡ് നിരക്കിലെത്തി. ചരിത്രത്തിലാദ്യമായി ഏതാനും ദിവസങ്ങൾക്ക് മുമ്പാണ് സ്വർണവില ഒരു ലക്ഷം രൂപ എന്ന നാഴികക്കല്ല് പിന്നിട്ടത്. അതിന് ശേഷവും വില തുടർച്ചയായി ഉയരുകയാണ്. ഒരു പവൻ ആഭരണം വാങ്ങുമ്പോൾ ഈ വിലയ്ക്ക് പുറമെ 3% ജിഎസ്ടിയും പണിക്കൂലിയും നൽകേണ്ടി വരുമെന്നതിനാൽ ഉപഭോക്താവിന് ഒരു പവൻ സ്വർണ്ണത്തിന് ഏകദേശം 1.10 ലക്ഷത്തിന് മുകളിൽ ചിലവ് വരും.ഒരു ഗ്രാം സ്വർണത്തിന്റെ വില 110 രൂപ വർദ്ധിച്ച് 12,945 രൂപയിലെത്തി.

Also Read : ബിഹാറിന് കോളടിച്ചു; മണ്ണിനടിയിലുള്ളത് 40,000 കോടിയുടെ സ്വർണ്ണ നിക്ഷേപം

രാജ്യാന്തര വിപണിയിലെ ചലനങ്ങളാണ് കേരളത്തിലെ സ്വർണവിലയെ സ്വാധീനിക്കുന്നത്. ആഗോള ഭൗമ രാഷ്ട്രീയ പ്രതിസന്ധികൾ നിലനിൽക്കുന്ന സാഹചര്യത്തിൽ സുരക്ഷിത നിക്ഷേപം എന്ന നിലയിൽ സ്വർണത്തിന് ഡിമാൻഡ് വർദ്ധിക്കുന്നതാണ് വിലക്കയറ്റത്തിന്റെ പ്രധാന കാരണം. ഈ മാസത്തിന്റെ തുടക്കത്തിൽ 95,680 രൂപയായിരുന്നു പവൻ വില. ഡിസംബർ 9-ന് 94,920 രൂപയായി കുറഞ്ഞതാണ് ഈ മാസത്തെ ഏറ്റവും താഴ്ന്ന നിരക്ക്. എന്നാൽ അവിടെ നിന്ന് വൻ കുതിപ്പാണ് പിന്നീട് ദൃശ്യമായത്. സ്വർണവില ഇതേ വേഗത്തിൽ മുന്നോട്ട് പോയാൽ വൈകാതെ തന്നെ പവന് ഒന്നേകാൽ ലക്ഷം രൂപ വരെ എത്തിയേക്കാമെന്നാണ് വിപണി വിദഗ്ധരുടെ വിലയിരുത്തൽ.