ഷെയ്ൻ നിഗം ചിത്രം ഹാൽ ഹൈക്കോടതി കാണും; ആക്ഷേപങ്ങള്‍ തെറ്റെങ്കിൽ പിഴ ഉറപ്പ്

ഷെയ്ൻ നിഗം നായകനായ ഹാൽ എന്ന സിനിമ ഹൈക്കോടതി ഡിവിഷൻ ബെഞ്ച് കാണും. കത്തോലിക്ക കോൺഗ്രസ് നൽകിയ അപ്പീലിൽ കൂടുതൽ വാദം കേൾക്കുന്നതിന് മുന്നോടിയായാണ് നടപടി. ജസ്റ്റിസുമാരായ സുശ്രുത് അരവിന്ദ് ധർമ്മാധികാരി, പി.വി ബാലകൃഷ്ണൻ എന്നിവരുടെ ഡിവിഷൻ ബെഞ്ചാണ് ബുധനാഴ്ച ചിത്രം കാണുക.

സിനിമക്കെതിരെയുള്ള ആക്ഷേപങ്ങൾ ശരിയല്ലെങ്കിൽ ഹർജിക്കാർക്കെതിരെ പിഴ ചുമത്തും എന്ന് കോടതി കർശന മുന്നറിയിപ്പ് നൽകി. സിനിമയിൽ മതവികാരം വ്രണപ്പെടുത്തുന്നതോ, ആക്ഷേപകരമായതോ ആയ ഉള്ളടക്കം ഇല്ലെന്ന് കോടതിക്ക് ബോധ്യപ്പെട്ടാൽ പിഴ ചുമത്തും. കൂടാതെ, സിനിമയിലെ ഏതെല്ലാം ഭാഗങ്ങളിലാണ് എതിർപ്പുള്ളതെന്ന് കൃത്യമായ സമയക്രമം സഹിതം രേഖാമൂലം അറിയിക്കാനും കോടതി കത്തോലിക്ക കോൺഗ്രസിന് നിർദേശം നൽകി.

Also Read : ‘ഹാൽ സിനിമ എങ്ങനെ കത്തോലിക്ക കോൺഗ്രസിനെ ബാധിക്കും?’; ചോദ്യമുയർത്തി ഹൈക്കോടതി

സിനിമയിലെ ചില രംഗങ്ങൾ മതവികാരം വ്രണപ്പെടുത്തുന്നു. ചിത്രം ലൗ ജിഹാദിനെ പ്രോത്സാഹിപ്പിക്കുന്നു എന്നിവയാണ് കത്തോലിക്ക കോൺഗ്രസിൻ്റെ ആക്ഷേപങ്ങൾ. സിനിമയ്ക്ക് എ സർട്ടിഫിക്കറ്റ് നൽകിയ സെൻസർ ബോർഡ് നടപടി ഹൈക്കോടതിയിലെ സിംഗിൾ ബെഞ്ച് റദ്ദാക്കിയിരുന്നു.

മതപരമായ നിയന്ത്രണങ്ങളെ മറികടക്കാൻ പ്രണയത്തിന് കഴിയുമെന്ന പ്രമേയമാണ് സിനിമയുടേത്. ഈ പ്രമേയം ഭരണഘടനാപരമായ മൂല്യങ്ങളുമായി ചേർന്നുപോകുന്നതാണ് എന്നും, പരസ്പര വിശ്വാസങ്ങളെ സിനിമ തെറ്റായി ചിത്രീകരിക്കുന്നില്ലെന്നും സിംഗിൾ ബെഞ്ച് നിരീക്ഷിച്ചിരുന്നു.

സെൻസർ ബോർഡിന് ഇഷ്ടാനുസരണം അത്തരം അധികാരം പ്രയോഗിക്കാൻ കഴിയില്ലെന്നും സിംഗിൾ ബെഞ്ച് വ്യക്തമാക്കി. ഈ വാദങ്ങളെല്ലാം തള്ളിക്കളഞ്ഞുകൊണ്ടാണ് സിനിമയുടെ പ്രദർശനാനുമതി അപേക്ഷ വീണ്ടും പരിഗണിക്കാൻ സെൻസർ ബോർഡിന് സിംഗിൾ ബെഞ്ച് നിർദ്ദേശം നൽകിയിരുന്നത്. ഇതിനെതിരെയാണ് കത്തോലിക്ക കോൺഗ്രസ് ഡിവിഷൻ ബെഞ്ചിനെ സമീപിച്ചത്.