ട്രാക്കിലെ ആ നമ്പറുകൾ ശ്രദ്ധിക്കൂ, കുറ്റവാളികളെ പിടികൂടാം; ട്രെയിൻ കല്ലേറിനെതിരെ യാത്രക്കാരെ അണിനിരത്തി റെയിൽവേ

കേരളത്തിൽ ട്രെയിനുകൾക്ക് നേരെയുള്ള കല്ലേറ് സംഭവങ്ങൾ വർധിച്ചു വരുന്ന സാഹചര്യത്തിൽ കർശന നടപടിയുമായി റെയിൽവേ സംരക്ഷണ സേനയും കേരള പോലീസും. യാത്രക്കാരുടെ സുരക്ഷയ്ക്ക് ഭീഷണിയാകുന്ന ഇത്തരം കുറ്റകൃത്യങ്ങളിൽ ഏർപ്പെടുന്നവർക്കെതിരെ റെയിൽവേ നിയമപ്രകാരം ജാമ്യമില്ലാ വകുപ്പുകൾ ചുമത്തി കേസെടുക്കാനാണ് തീരുമാനം. ട്രാക്കിന് സമീപം ഓരോ 100 മീറ്റർ ഇടവിട്ടും ദൂരം അടയാളപ്പെടുത്തിയ ചെറിയ കുറ്റികൾ റെയിൽവേ സ്ഥാപിച്ചിട്ടുണ്ട്. കല്ലേറോ സംശയാസ്പദമായ സാഹചര്യങ്ങളോ കണ്ടാൽ ഉടൻ തന്നെ അടുത്തുള്ള പോസ്റ്റിലെ നമ്പറുകൾ ശ്രദ്ധിച്ച് ആർപിഎഫിനെ അറിയിക്കാനുള്ള നിർദ്ദേശങ്ങൾ യാത്രക്കാർക്ക് നൽകിയിട്ടുണ്ട്. റെയിൽവേ ഹെൽപ്‌ലൈൻ നമ്പറായ 139-ൽ വിളിച്ച് ഈ വിവരങ്ങൾ കൈമാറാവുന്നതാണ്.

Also Read : ആക്രിവിറ്റ് 19,000 കോടി നേടി റെയിൽവേ; ‘മിഷൻ സീറോ സ്ക്രാപ്പ്’പുതിയ വരുമാനവഴികൾ തുറക്കുന്നു

കല്ലേറ് പതിവായ മേഖലകളിൽ പോലീസും ആർപിഎഫും സംയുക്തമായി പരിശോധന നടത്തും. ട്രെയിൻ പാതകൾക്ക് സമീപമുള്ള വിജനമായ സ്ഥലങ്ങൾ, പാലങ്ങൾ എന്നിവിടങ്ങളിൽ നിരീക്ഷണം ശക്തമാക്കും. ഡ്രോണുകൾ ഉപയോഗിച്ചുള്ള നിരീക്ഷണവും സിസിടിവി ക്യാമറകളുടെ സഹായവും തേടാനാണ് അധികൃതരുടെ നീക്കം. റെയിൽവേ നിയമത്തിലെ സെക്ഷൻ 152 പ്രകാരം ട്രെയിനുകൾക്ക് നേരെ കല്ലെറിയുന്നത് അതീവ ഗൗരവമുള്ള കുറ്റമാണ്. കുറ്റം തെളിയിക്കപ്പെട്ടാൽ അഞ്ച് വർഷം മുതൽ പത്ത് വർഷം വരെ തടവ് ശിക്ഷ ലഭിക്കാം. പ്രതികൾക്ക് റെയിൽവേ സ്റ്റേഷനുകളിൽ പ്രവേശിക്കുന്നതിനും ട്രെയിൻ യാത്രകൾക്കും ആജീവനാന്ത വിലക്ക് ഏർപ്പെടുത്തുന്ന കാര്യവും പരിഗണനയിലുണ്ട്. പ്രായപൂർത്തിയാകാത്ത കുട്ടികളാണ് ഇത്തരം പ്രവൃത്തികളിൽ ഏർപ്പെടുന്നതെങ്കിൽ മാതാപിതാക്കൾക്കെതിരെ നിയമനടപടികൾ സ്വീകരിക്കും.

റെയിൽവേ ട്രാക്കുകൾക്ക് സമീപമുള്ള സ്കൂളുകൾ, ക്ലബ്ബുകൾ, റെസിഡന്റ്സ് അസോസിയേഷനുകൾ എന്നിവ കേന്ദ്രീകരിച്ച് ബോധവൽക്കരണം നടത്തും. ട്രെയിനുകൾക്ക് നേരെയുള്ള കല്ലേറ് കേവലം ഒരു വിനോദമല്ലെന്നും അത് മനുഷ്യജീവന് അപകടമുണ്ടാക്കുന്ന വലിയ കുറ്റമാണെന്നും ജനങ്ങളെ ബോധ്യപ്പെടുത്തുകയാണ് ലക്ഷ്യം. ട്രെയിനുകൾക്ക് നേരെ കല്ലേറ് ഉണ്ടാകുന്നത് ശ്രദ്ധയിൽപ്പെട്ടാൽ ഉടൻ തന്നെ 139 എന്ന റെയിൽവേ ഹെൽപ്‌ലൈൻ നമ്പറിലോ പോലീസിനെയോ വിവരം അറിയിക്കണമെന്ന് അധികൃതർ അഭ്യർത്ഥിച്ചു. പ്രതികളെ പിടികൂടാൻ സഹായിക്കുന്നവർക്ക് പാരിതോഷികം നൽകുന്ന കാര്യവും അധികൃതർ ആലോചിക്കുന്നുണ്ട്.