ട്രെയിനിൽ സീറ്റ് കിട്ടാത്തതിനെ തുടർന്ന് പെപ്പർ സ്പ്രേ പ്രയോഗം; യുവതിയെ പിടികൂടി യാത്രക്കാർ

സീറ്റ് കിട്ടാത്തതിന്റെ പേരിൽ സ്ത്രീകൾ തമ്മിലുണ്ടായ തർക്കമാണ് പെപ്പർ സ്പ്രേയിൽ കലാശിച്ചത്. കൊൽക്കത്തയിലെ തിരക്കേറിയ ലോക്കൽ ട്രെയിനിലാണ് യുവതി പെപ്പർ സ്പ്രേ അടിച്ചത്. ഇത് കാരണം ട്രെയിനിലുള്ളവർക്ക് ചുമയും ശ്വാസം മുട്ടലും അനുഭവപെട്ടു. സീയാൾഡയിലേക്ക് പോകുന്ന ഒരു ലോക്കൽ ട്രെയിനിലെ വനിതാ കമ്പാർട്ട്മെന്റിലാണ് സംഭവം നടന്നത്. യാത്രക്കാർ പകർത്തിയ വീഡിയോയാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്.

ട്രെയിനിൽ കയറിയ സ്ത്രീ മറ്റൊരു സ്ത്രീയുമായി സീറ്റിനെച്ചൊല്ലി തർക്കത്തിലേർപ്പെട്ടു. താൻ ചോദിച്ച സീറ്റ് ലഭിക്കാത്തതിനാൽ ബാഗിൽ നിന്ന് പെപ്പർ സ്പ്രേ എടുത്തു അവർക്കു നേരെ അടിക്കുകയായിരുന്നു. എന്നാൽ ആ കമ്പാർട്ട്മെന്റിൽ കുട്ടികളുൾപ്പടെയുള്ളവർ ഉണ്ടായിരുന്നു. ഇത് കാരണം അവർക്കു ചുമയും ശ്വാസം മുട്ടലും അനുഭവപെട്ടു. രണ്ട് കുട്ടികൾക്ക് വളരെയധികം അസ്വസ്ഥതയും ഉണ്ടായി. ഇത് തടയാൻ ശ്രമിച്ചെങ്കിലും അവർ വീണ്ടും ഇത് ആവർത്തിക്കുകയായിരുന്നു.

പിന്നീട്, യാത്രക്കാർ ഈ സ്ത്രീയെ പിടികൂടി പൊലീസിനെ ഏൽപിക്കുകയായിരുന്നു. ഇവരെ റെയിൽവേ പൊലീസ് കസ്റ്റഡിയിലെടുത്ത് ചോദ്യം ചെയ്തു. സംഭവത്തിൽ അന്വേഷണം ആരംഭിച്ചിട്ടുണ്ട്. സ്വന്തം സുരക്ഷയ്ക്കുള്ള പെപ്പർ സ്പ്രേ മറ്റുള്ളവരെ ഉപദ്രവിക്കാൻ ഉപയോഗിച്ചതിൽ കർശന നടപടി എടുക്കണമെന്നാണ് യാത്രക്കാർ ആവശ്യപ്പെട്ടത്. ക്രിമിനൽ മനസ്സുള്ളവർക്കേ ഇങ്ങനെ ചെയ്യാൻ കഴിയുകയുള്ളു എന്നാണ് സോഷ്യൽ മീഡിയയും പ്രതികരിക്കുന്നത്.