സഹോദരിമാരെ കൊലപ്പെടുത്തിയ സഹോദരൻ മരിച്ച നിലയിൽ? ആത്മഹത്യയെന്ന് സംശയം

കോഴിക്കോട് വയോധികരായ സഹോദരിമാരെ കൊലപ്പെടുത്തിയ കേസിൽ പ്രതിയായ സഹോദരൻ പ്രമോദ് മരിച്ചതായി സംശയം. കഴിഞ്ഞദിവസം തലശ്ശേരിയിൽ കണ്ടെത്തിയ മൃതദേഹം പ്രതിയായ പ്രമോദിന്റെതാണെന്ന് സംശയിക്കുന്നതായാണ് പൊലീസ് പറഞ്ഞത്. വിശദമായ അന്വേഷണം നടത്തിവരികയാണ്. എന്നാൽ ബന്ധുക്കൾ മൃതദേഹം തിരിച്ചറിഞ്ഞതായാണ് വിവരം. തലശ്ശേരി പുഴയിൽ നിന്നാണ് മൃതദേഹം കണ്ടെത്തിയത്.

കഴിഞ്ഞ ശനിയാഴ്ചയാണ് കരിക്കാംകുളം ‘പൗർണമി’ എന്ന വാടകവീട്ടിൽ വയോധികരായ സഹോദരിമാരെ മരിച്ച നിലയിൽ കണ്ടെത്തുന്നത്. 71 വയസ്സുള്ള ശ്രീജയ 66 വയസ്സുള്ള പുഷ്പലളിത എന്നിവരാണ് കൊല്ലപ്പെട്ടത്. മരണവിവരം ബന്ധുക്കളെ വിളിച്ച് അറിയിച്ചത് സഹോദരനായ പ്രമോദായിരുന്നു. അതിനുശേഷം ഇയാൾ അവിടുന്ന് രക്ഷപ്പെടുകയായിരുന്നു. പ്രതിക്കായി പൊലീസ് ലുക്ക് ഓഫ് നോട്ടീസും പുറത്തിറക്കിയിരുന്നു.

കഴുത്ത് ഞെരിച്ചാണ് ഇയാൾ സഹോദരിമാരെ കൊലപ്പെടുത്തിയത്. ഇത് പോസ്റ്റ്മോർട്ടം റിപ്പോർട്ടിൽ തെളിയുകയും ചെയ്തു. കഴിഞ്ഞ മൂന്നുവർഷമായി ഇയാൾ സഹോദരിമാരോടൊപ്പം വാടക വീട്ടിലാണ് താമസിച്ചിരുന്നത്. സഹോദരിമാരിൽ ഒരാൾ കിടപ്പിലായിരുന്നു. ഇവരെ പരിചരിച്ചിരുന്നതും പ്രമോദ് ആയിരുന്നു. ഇതിനു കഴിയാത്തത് കൊണ്ടാണ് കൊലപാതകം നടത്തിയതെന്നാണ് പൊലീസിന്റെ പ്രാഥമിക നിഗമനം .