സണ്ണി ജോസഫ് തിങ്കളാഴ്ച ചുതലയേല്‍ക്കും; പുനസംഘടനാ ചര്‍ച്ചകള്‍ക്കായി നാളെ ഡല്‍ഹിക്ക്
കെപിസിസി പ്രസിഡന്റായി സണ്ണി ജോസഫ് തിങ്കളാഴ്ടച ചുമതലയേല്‍ക്കും. രാവിലെ 9.30ന് ലളിതമായ ചടങ്ങില്‍ സ്ഥാനം ഏറ്റെടുക്കാനാണ് തീരുമാനം. നിലവില്‍ മലബാര്‍ മേഖലയിലെ പ്രധാന നേതാക്കളെ കാണുകയാണ് സണ്ണി ജോസഫ് . നാളെ പുനസംഘടനാ ചര്‍ച്ചകള്‍ക്കായി ഡല്‍ഹിക്ക് പോകും. ഡല്‍ഹിയില്‍ നിന്നും തിരുവനന്തപുരത്ത് എത്തിയാണ് ചുമതലയേല്‍ക്കുക. വര്‍ക്കിങ് പ്രസിഡന്റുമാരായി നിയമിച്ച എപി അനില്‍ കുമാര്‍, പിസി വിഷ്ണുനാഥ്, ഷാഫി പറമ്പില്‍ എന്നിവരും തിങ്കളാഴ്ച ചുമതലയേല്‍ക്കുന്നുണ്ട്.
നിര്‍ജീവമായ അവസ്ഥയിലുള്ള കോണ്‍ഗ്രസില്‍ സമ്പൂര്‍ണ്ണ അഴിച്ചു പണിയാണ് സണ്ണി ജോസഫ് ലക്ഷ്യമിടുന്നത്. സംഘടനാ ജനറല്‍ സെക്രട്ടറി എം ലിജു അടക്കം ഭൂരിഭാഗം ഭാരവാഹികളേയും മാറ്റാനാണ് ധാരണ. ഡിസിസി പ്രസിഡന്റുമാരിലും മാറ്റം ഉണ്ടാകും. ഇക്കാര്യത്തില്‍ ധാരണ ഉണ്ടാക്കാനാണ് സണ്ണി ജോസഫിന്റെ ഡല്‍ഹി യാത്ര. ആള്‍കൂട്ടം എന്ന നിലയില്‍ നിന്നും മാറി പ്രവര്‍ത്തിക്കുന്നവരുടെ നിരയെ നേതൃത്വത്തില്‍ എത്തിക്കാനാണ് ശ്രമം.
നീണ്ട ഇടവേളയ്ക്ക് ശേഷമാണ് ക്രിസ്ത്യന്‍ വിഭാഗത്തില്‍ നിന്നും ഒരു കെപിസിസി പ്രസിഡന്റ് വരുന്നത്. കെസി ഏബ്രഹാം, കെഎം ചാണ്ടി, എകെ ആന്റണി, എഎല്‍ ജേക്കബ്, പിപി തങ്കച്ചന്‍ എന്നിവരാണ് സണ്ണി ജോസഫിന് മുമ്പ് കെപിസിസി പ്രസിഡന്റായിട്ടുള്ള ക്രൈസ്തവ നേതാക്കള്‍.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
