അരങ്ങൊഴിഞ്ഞ് പങ്കജ് ധീർ; അനശ്വരനായ കർണ്ണന് വിട

ജനപ്രിയമായ മഹാഭാരതം എന്ന ഐതിഹാസിക പരമ്പരയിലൂടെ ഇന്ത്യൻ ടെലിവിഷൻ പ്രേക്ഷകരുടെ മനസ്സിൽ അജയ്യനായ കർണ്ണനായി അഭിനയിച്ച പ്രശസ്ത നടൻ പങ്കജ് ധീർ (68) മുംബൈയിൽ വച്ച് മരണപ്പെട്ടു. അർബുദ രോഗത്തെ തുടർന്ന് ഏറെ നാളായി ചികിത്സയിലായിരുന്നു അദ്ദേഹം.

മഹാഭാരതത്തിലെ കർണ്ണൻ എന്ന കഥാപാത്രത്തിന് പങ്കജ് ധീർ നൽകിയ തീവ്രമായ ഭാവവും, സംഭാഷണ ശൈലിയും ഇന്ത്യൻ ടെലിവിഷൻ ചരിത്രത്തിൽ മായാത്ത മുദ്രമായി നിലനിൽക്കുന്നു. പരമ്പരയുടെ വിജയത്തിന് പിന്നിലെ നിർണ്ണായക ശക്തികളിലൊരാളായിരുന്നു പങ്കജ് ധീർ. ഒരു സാധാരണ നടനെന്ന നിലയിൽ നിന്ന് കർണ്ണൻ എന്ന ഒറ്റ കഥാപാത്രത്തിലൂടെ അദ്ദേഹം രാജ്യമെമ്പാടുമുള്ള കുടുംബങ്ങളുടെ ആരാധനാപാത്രമായി മാറി.

1981-ൽ പൂനം എന്ന ചിത്രത്തിലൂടെ സിനിമയിൽ അരങ്ങേറ്റം കുറിച്ചെങ്കിലും, മഹാഭാരതമാണ് അദ്ദേഹത്തിന് താരപരിവേഷം നൽകിയത്. പിന്നീട് ചന്ദ്രകാന്ത, സീ ഹോറർ ഷോ, കാനൂൻ തുടങ്ങിയ ജനപ്രിയ ടെലിവിഷൻ പരമ്പരകളിലും അദ്ദേഹം തിളങ്ങി.

സോൾജ്യർ, അന്താസ്, ബാദ്ഷാ, തുംകോ ന ഭൂൽ പായേംഗേ തുടങ്ങിയ ചിത്രങ്ങളിലെ പ്രകടനങ്ങൾ അദ്ദേഹത്തിൻ്റെ അഭിനയ വൈദഗ്ദ്ധ്യം തെളിയിച്ചു. അടുത്തിടെ സസുരാൽ സിമർ കാ, ദേവോം കേ ദേവ്… മഹാദേവ് തുടങ്ങിയ ഷോകളിലും അദ്ദേഹം ഭാഗമായിരുന്നു.

ഭാര്യ അനിത ധീർ, നടനും മകനുമായ നികിതിൻ ധീർ, മരുമകൾ കൃതിക സെൻഗർ എന്നിവരടങ്ങുന്നതാണ് അദ്ദേഹത്തിൻ്റെ കുടുംബം. നികിതിൻ ധീർ ചെന്നൈ എക്സ്പ്രസ്, ജോധാ അക്ബർ തുടങ്ങിയ ചിത്രങ്ങളിലെ ശ്രദ്ധേയമായ വേഷങ്ങളിലൂടെ പിതാവിൻ്റെ കലാപാരമ്പര്യം മുന്നോട്ട് കൊണ്ടുപോകുന്നു. അന്ത്യകർമ്മങ്ങൾ ഇന്ന് വൈകുന്നേരം മുംബൈയിൽ വച്ച് നടക്കും.