എയർ ഇന്ത്യയിൽ ഹെൽമെറ്റ് ധരിച്ച് യാത്രക്കാരൻ… പിന്നിൽ വലിയ ലക്ഷ്യം

വിമാനയാത്രയ്ക്കിടെ ഹെൽമെറ്റ് ധരിച്ചെത്തിയ യുവാവിന്റെ വീഡിയോയാണ് സോഷ്യൽ മീഡിയയിൽ വൈറൽ ആവുന്നത്. എയർ ഇന്ത്യ വിമാനത്തിലെ യാത്രക്കാർ പകർത്തിയ ദൃശ്യങ്ങളാണ് ഇപ്പോൾ ചർച്ചാവിഷയം. എല്ലാവർക്കും അതൊരു രസകരമായ വിഡിയോ ആയിരുന്നു. എന്നാൽ ആ മനുഷ്യന് അതൊട്ടും തമാശയായിരുന്നില്ല.

റോഡുസുരക്ഷാ ആക്ടിവിസ്റ്റ് രാഘവേന്ദ്ര കുമാർ ആയിരുന്നു അത്. “ഹെൽമെറ്റ് മാൻ” എന്നറിയപ്പെടുന്ന അദ്ദേഹം ഹെൽമെറ്റ് ഉപയോഗം പ്രോത്സാഹിപ്പിക്കാനും റോഡുസുരക്ഷാ അവബോധം വളർത്താനും പേരുകേട്ടയാളാണ്. കോൻ ബനേഗ ക്രോർപതിയിൽ അമിതാഭ് ബച്ചൻ ആദരിച്ചതടക്കം ഒട്ടേറെ അംഗീകാരങ്ങൾ ലഭിച്ചിട്ടുണ്ട്.

‘റോഡിലായാലും വായുവിലായാലും എല്ലായിടത്തും സുരക്ഷ പ്രധാനമാണ്. ജനങ്ങളിൽ അവബോധം വളർത്താൻ ഇത് സഹായിക്കും. അസാധാരണമായ സാഹചര്യത്തിൽ ഹെൽമെറ്റ് ധരിക്കുന്ന ചെറിയ പ്രവൃത്തി പോലും വൈറലാകുകയും മറ്റുള്ളവരെ സുരക്ഷ പിന്തുടരാൻ പ്രേരിപ്പിക്കുകയും ചെയ്യുമെന്നാണ്’ അദ്ദേഹം ഇതിനെതിരെ പ്രതികരിച്ചത്.

2014ൽ അദ്ദേഹത്തിന്റെ സുഹൃത്ത് വാഹനാപകടത്തിൽ മരിച്ചു. ഹെൽമെറ്റ് ധരിച്ചിരുന്നെങ്കിൽ ജീവൻ രക്ഷപ്പെടുമായിരുന്നു. ഈ ഒരു ചിന്തയാണ് പിന്നീട് അദ്ദേഹത്തെ ഇങ്ങനെയൊരു പാത പിന്തുടരാൻ പ്രേരിപ്പിച്ചത്. സ്വന്തം സമ്പാദ്യം ഉപയോഗിച്ച് ഹെൽമെറ്റുകൾ വാങ്ങി ഇരുചക്ര വാഹന യാത്രക്കാർക്ക് വിതരണം ചെയ്തു.

വർഷങ്ങളായുള്ള കുമാറിന്റെ ശ്രമം പിന്നീട് “ഹെൽമെറ്റ് മാൻ ഓഫ് ഇന്ത്യ” ഫൗണ്ടേഷനായി മാറി. ഫൗണ്ടേഷൻ ഇപ്പോൾ ഹെൽമെറ്റ് ബാങ്കുകൾ നടത്തുകയും ഡൽഹി, കാൺപൂർ, ലഖ്‌നൗ, മീററ്റ്, നോയിഡ എന്നിവിടങ്ങളിൽ പരിപാടികൾ നടത്തുകയും ചെയ്യുന്നു. 65,000 ത്തിലധികം ഹെൽമെറ്റുകൾ വിതരണം ചെയ്തു. സാമ്പത്തികപ്രശ്നങ്ങൾ ഉണ്ടെങ്കിലും പിന്മാറാൻ അദ്ദേഹം തയാറായിട്ടില്ല.