ഓണത്തിന് സ്‌കൂള്‍ കുട്ടികള്‍ക്ക് നാലു കിലോ അരി: പിണറായി സര്‍ക്കാരിന്റെ സമ്മാനമെന്ന് മന്ത്രി ശിവന്‍കുട്ടി

സ്‌കൂള്‍ ഉച്ചഭക്ഷണ പദ്ധതിയുടെ ഗുണഭോക്താക്കളായ എല്ലാ വിദ്യാര്‍ത്ഥികള്‍ക്കും ഓണത്തിന് അരി നല്‍കും. നാലു കിലോഗ്രാം അരി വീതം വിതരണം ചെയ്യുമെന്ന് വിദ്യാഭ്യാസമന്ത്രി വി ശിവന്‍കുട്ടി അറിയിച്ചു. പ്രീ-പ്രൈമറി മുതല്‍ എട്ടാം ക്ലാസ് വരെയുള്ള കുട്ടികള്‍ക്കാണ് വിതരണം. 24,77,337 കുട്ടികള്‍ക്കാണ് ഇതിന്റെ പ്രയോജനം ലഭിക്കുക. അരി സിവില്‍ സപ്ലൈസ് കോര്‍പ്പറേഷന്റെകൈവശമുള്ള സ്റ്റോക്കില്‍ നിന്ന് നല്‍കാനാണ് സര്‍ക്കാര്‍ അനുമതി നല്‍കിയിരിക്കുന്നത്.

അരി സ്‌കൂളുകളില്‍ നേരിട്ട് എത്തിച്ചു നല്‍കുന്നതിനുള്ള ചുമതലയും സപ്ലൈക്കോക്കാണ്് നല്‍കിയിരിക്കുന്നത്. ഇതിനായി നിലവിലെ കടത്തുകൂലിക്ക് പുറമെ കിലോ ഗ്രാമിന് 50 പൈസ അധികം നല്‍കാനും തീരുമാനിച്ചു. ജില്ലകളില്‍ സ്റ്റോക്ക് കുറവുണ്ടെങ്കില്‍ സമീപ ജില്ലകളിലെ ഡിപ്പോകളില്‍ നിന്ന് അരി എത്തിച്ച് വിതരണം സുഗമമാക്കാനും നിര്‍ദേശം നല്‍കിയിട്ടുണ്ട്.