അൻമോൽ ബിഷ്ണോയിയുടെ കസ്റ്റഡി നീട്ടി! അന്വേഷണം ശക്തമാക്കി എൻഐഎ

ഗുണ്ടാത്തലവനായ ലോറൻസ് ബിഷ്ണോയിയുടെ സഹോദരനും അന്താരാഷ്ട്ര ഗുണ്ടാസംഘത്തിലെ പ്രധാനിയുമായ അൻമോൽ ബിഷ്ണോയിയുടെ കസ്റ്റഡി കാലാവധി എൻഐഎ ഏഴ് ദിവസത്തേക്ക് കൂടി നീട്ടി. നവംബർ 19ന് 11 ദിവസത്തെ കസ്റ്റഡിയിൽ വിട്ട അൻമോലിനെ, ഇപ്പോൾ ഡിസംബർ 5 വരെ എൻഐഎ കസ്റ്റഡിയിൽ വെച്ച് ചോദ്യം ചെയ്യാം.

അൻമോൽ ബിഷ്ണോയിക്ക് ഭീഷണിയുള്ളതിനാൽ എൻഐഎ ജഡ്ജി നേരിട്ട് എൻഐഎ ആസ്ഥാനത്ത് എത്തിയാണ് വാദം കേട്ടത്. അൻമോൽ, ബികെഐ ബിഷ്ണോയി ഗുണ്ടാസംഘത്തിലെ പ്രധാനിയാണ്. ഈ സംഘത്തിൻ്റെ പ്രവർത്തനങ്ങൾ മുന്നോട്ട് കൊണ്ടുപോകുന്നതിൽ ഇയാൾക്ക് സജീവമായ പങ്കുണ്ട്. ഇയാൾക്ക് ഖാലിസ്ഥാനി ഗ്രൂപ്പുകളുമായി ബന്ധമുണ്ടെന്നും, തീവ്രവാദ ക്രിമിനൽ ശൃംഖലയുമായുള്ള ബന്ധം അന്വേഷിക്കുമെന്നും എൻഐഎ അറിയിച്ചു.

തീവ്രവാദിയായി പ്രഖ്യാപിക്കപ്പെട്ട ഗോൾഡി ബ്രാറിനെയും കൂട്ടാളികളെയും ഭീകരപ്രവർത്തനങ്ങൾക്ക് അൻമോൽ സഹായിച്ചിരുന്നു. അമേരിക്കയിലിരുന്ന് ഇന്ത്യയിലെ ഗുണ്ടാപ്രവർത്തനങ്ങൾ ഏകോപിപ്പിച്ചു, ഷൂട്ടർമാർക്ക് ഒളിത്താവളം ഒരുക്കി, പ്രമുഖ വ്യക്തികളെ ഭീഷണിപ്പെടുത്തി പണം തട്ടിയതിന് മേൽനോട്ടം വഹിച്ചു തുടങ്ങി നിരവധി കുറ്റങ്ങൾ ഇയാൾക്കെതിരെയുണ്ട്.

കൂടാതെ, മുൻ മഹാരാഷ്ട്ര മന്ത്രിയും എൻസിപി നേതാവുമായ ബാബ സിദ്ദിഖിന്റെ കൊലപാതക ഗൂഢാലോചന, നടൻ സൽമാൻ ഖാന്റെ മുംബൈയിലെ വീടിന് പുറത്ത് നടന്ന വെടിവയ്പ്പ്, പഞ്ചാബി ഗായകൻ സിദ്ദു മൂസേവാലയുടെ കൊലപാതകം, തുടങ്ങിയ നിരവധി കുറ്റങ്ങളാണ് ഇയാൾക്കെതിരെ നിലവിലുള്ളത്. 2022 മുതൽ ഒളിവിലായിരുന്ന അൻമോൽ, നവംബർ 19ന് അമേരിക്കയിൽ നിന്ന് ഇന്ത്യയിൽ എത്തിയ ഉടൻ അറസ്റ്റ് ചെയ്യപ്പെടുകയായിരുന്നു.