ഇനി സമരം വേണ്ട!! കാലിക്കറ്റ് യൂണിവേഴ്സിറ്റിയിൽ പൊലീസ് ഇടപെടൽ

കാലിക്കറ്റ് യൂണിവേഴ്സിറ്റിയിൽ സമരങ്ങൾ നിരോധിച്ച് പൊലീസ്. നേരത്തെയുള്ള ഹൈക്കോടതി ഉത്തരവ് ചൂണ്ടിക്കാട്ടിയാണ് നിരോധനം ഏർപ്പെടുത്തിയത്. ഇക്കാര‍്യം വിശദീകരിച്ച് തേഞ്ഞിപ്പലം പൊലീസ്, വിദ്യാർത്ഥി സംഘടനകൾക്ക് നോട്ടീസ് നൽകി.

കഴിഞ്ഞ കുറച്ചു നാളുകളായി യൂണിവേഴ്സിറ്റിയിൽ തുടർച്ചയായി സമരങ്ങൾ നടന്നിരുന്നു. ഈ സമരങ്ങൾ സംഘർഷത്തിൽ കലാശിക്കുന്ന സ്ഥിതിയിലേക്കും മാറിയിരുന്നു. ഇതെല്ലാം കണക്കിലെടുത്താണ് പൊലീസ് നടപടിയെന്നാണ് സൂചന.

സർവകലാശാലാ കെട്ടിടങ്ങൾ, പരീക്ഷാ ഭവൻ, അഡ്മിനിസ്ട്രേറ്റിവ് ഓഫീസ് എന്നിവയുടെ 200 മീറ്റർ ചുറ്റളവിൽ സമരമോ ധർണയോ പാടില്ലെന്ന് പൊലീസ് പറ‍യുന്നു. ഇത് ലംഘിച്ചാൽ കർശന നടപടി ഉണ്ടാകും എന്നാണ് മുന്നറിയിപ്പ്.

പൊലീസ് നടപടിയോട് യൂണിവേഴ്സിറ്റി അധികൃതർ ഇതുവരെ പ്രതികരിച്ചിട്ടില്ല. വിദ്യാർത്ഥി സംഘടനകൾ ശക്തമായി നിലനിൽക്കുന്ന ക്യാമ്പസിൽ പൊലീസ് ഇടപെടൽ എത്ര പ്രായോഗികമാകും എന്ന് അടുത്ത ദിവസങ്ങളിൽ തന്നെ അറിയാം.