ഓണസദ്യയിലും പൊളിറ്റിക്സ് ; സതീശന് സദ്യ തൃപ്തിയായില്ലെന്ന് സോഷ്യൽ മീഡിയ നിരീക്ഷണം

മുഖ്യമന്ത്രി സംഘടിപ്പിച്ച ഓണാഘോഷത്തിലെ സദ്യ, പ്രതിപക്ഷ നേതാവിന് തൃപ്തികരമായില്ല എന്നാണ് സോഷ്യൽ മീഡിയയിൽ പലരുടെയും നിരീക്ഷണം. പിണറായി വിജയനൊപ്പം സദ്യ കഴിച്ചുകഴിഞ്ഞ് ഇല മടക്കിയതിൻ്റെ ഫോട്ടോ വച്ചാണ് ഈ നിഗമനം. സദ്യ തൃപ്തികരം എങ്കിൽ സ്വന്തം വശത്തേക്ക്, അതായത് ഇല അകത്തേക്ക് മടക്കുമെന്നും, അല്ലെങ്കിൽ പുറത്തേക്ക് മടക്കും എന്നുമുള്ള സദ്യയൂണിലെ കീഴ്വഴക്കം ചൂണ്ടിക്കാണിച്ചാണ് സോഷ്യൽ മീഡിയ ചർച്ചകൾ.

Also Read: ആചാര സംരക്ഷണത്തിന് രക്തസാക്ഷിയായ ചന്ദ്രൻ ഉണ്ണിത്താനെ എല്ലാവരും മറന്നു; കൊലപാതകികൾ പാർട്ടി സംരക്ഷണയിൽ

മുഖ്യമന്ത്രിയുടെ മുന്നിലെ ഇല അകത്തേക്ക് മടക്കിയ നിലയിൽ ഫോട്ടോയിൽ കാണാം. അദ്ദേഹത്തിന് സദ്യ ‘ക്ഷ ബോധിച്ചു’ എന്നാണ് അതിനർത്ഥം എന്നാണ് പലരുടെയും വിലയിരുത്തൽ. അദ്ദേഹമൊരുക്കിയ സദ്യയാകുമ്പോൾ അങ്ങനെ തന്നെയാകണമല്ലോ… !!

Also Read: പിണറായിക്കേറ്റ ലോക്കപ്പ് മർദ്ദനത്തിന് സമാനം കുന്നംകുളത്തെ സുജിത് നേരിട്ടത്; രണ്ടുപേരെയും ഭേദ്യം ചെയ്തത് അടിവസ്ത്രത്തിൽ നിർത്തി

സദ്യയിലെ ഇലമടക്കം പോലും നിരീക്ഷിച്ച് വിലയിരുത്തുന്ന ‘നവ പൊളിറ്റിക്കൽ’ തർക്കങ്ങൾക്ക് കൂടി ഈ ഓണക്കാലത്ത് സൈബറിടം വേദിയാകുന്നു എന്ന കൌതുകാണ് മുന്നിൽ നിൽക്കുന്നത്. ഫോട്ടോയ്ക്ക് താഴെ രാഷ്ട്രീയത്തിന് ഉപരിയായി എല്ലാ പാർട്ടികളുടെയും അണികൾ രസകരമായ കമന്റുകളും പങ്കുവയ്ക്കുന്നുണ്ട്. അങ്ങനെ തൽക്കാലത്തേക്ക് എങ്കിലും സംഘർഷത്തേക്കാൾ സമഭാവനയുടേതായി ഈ ഓണം എന്നും ആശ്വസിക്കാം.