നടൻ ദുൽഖർ സൽമാന്റെ കാർ വിട്ടുകാെടുത്തു; ഉപാധികളോടെ ലാൻഡ് റോവർ ഡിഫൻഡർ പുറത്തേക്ക്

ഓപ്പറേഷൻ നുംഖോറിന്റെ ഭാഗമായി പിടിച്ചെടുത്ത നടൻ ദുൽഖർ സൽമാന്റെ കാർ വിട്ടു കൊടുത്തു. ഉപാധികളോടെയാണ് കസ്റ്റംസ് ലാൻഡ് റോവർ ഡിഫൻഡർ വിട്ടുനൽകിയത്. വാഹനരേഖകൾക്കൊപ്പം വാഹനവിലയുടെ 20 ശതമാനവും ബാങ്ക് ഗാരന്റിയും ബോണ്ടും സമർപ്പിക്കണം. വാഹനം ഉപയോഗിക്കാം എങ്കിലും ഉടമസ്ഥതയോ രൂപമോ മാറ്റാൻ പാടില്ല. കസ്റ്റംസ് ആവശ്യപ്പെടുമ്പോൾ ഹാജരാക്കണം തുടങ്ങിയ ഉപാധികളോടെയാണ് വാഹനം വിട്ടു നൽകിയത്. തൃശൂർ സ്വദേശിയായ റോബിന്റെ കാറും ഇന്ന് നൽകിയിട്ടുണ്ട്.

43 വാഹനങ്ങളാണ് ഭൂട്ടാനിൽനിന്ന് കടത്തിയെന്നാരോപിച്ചു പിടിച്ചെടുത്തത്. ഇതിൽ ദുൽഖറിന്റെ ഒരുവാഹനം ഉൾപ്പെടെ വെറും നാലുവാഹനങ്ങൾ മാത്രമാണ് ഇപ്പോൾ കസ്റ്റംസിന്റെ പക്കലുള്ളത്. ബാക്കിയെല്ലാം വിട്ടുകൊടുത്തു. രണ്ടുഘട്ടങ്ങളിലായാണ് ദുൽഖറിന്റെ വാഹനങ്ങൾ പിടിച്ചെടുത്തത്

ലാൻഡ് റോവറാണ് ആദ്യം പിടിച്ചെടുത്തത്. ഈ കാർ വിട്ടുകിട്ടണമെന്ന ആവശ്യവുമായി ദുൽഖർ കോടതിയെ സമീപിച്ചിരുന്നു. എന്നാൽ കസ്റ്റംസിനെ സമീപിക്കാനായിരുന്നു കോടതിയുടെ നിർദ്ദേശം. അപേക്ഷ പരിഗണിക്കാൻ കോടതിയും കസ്റ്റംസിന് നിർദ്ദേശം നൽകി. ഉപാധികളോടെ വാഹനങ്ങൾ വിട്ടുകൊടുക്കാൻ കസ്റ്റംസ് നിയമത്തിൽ വ്യവസ്ഥയുണ്ട്. ഇതുപ്രകാരമാണ് കസ്റ്റംസ് വാഹനം വിട്ടുകൊടുക്കാൻ തീരുമാനിച്ചത്. ദുൽഖറിന്റെ നിസാൻ മാത്രമാണ് ഇനി കസ്റ്റംസിന്റെ പക്കൽ ഉള്ളത്.