രാഹുലിനുവേണ്ടി സംസാരിച്ച് രാഹുൽ ഈശ്വറിന് കുരുക്കായി! ചോദ്യം ചെയ്യാൻ വിളിപ്പിച്ച് പൊലീസ് കസ്റ്റഡിയിൽ എടുത്തു

സൈബർ അധിക്ഷേപം നടത്തിയെന്ന പരാതിയിൽ രാഹുൽ ഈശ്വറിനെ പൊലീസ് കസ്റ്റഡിയിലെടുത്തു. രാഹുൽ മാങ്കൂട്ടത്തിൽ എംഎൽഎക്കെതിരെ ബലാത്സംഗത്തിന് പരാതി നൽകിയ യുവതിയാണ്, സൈബർ അധിക്ഷേപം നടത്തിയെന്ന് ആരോപിച്ച് രാഹുൽ ഈശ്വർ അടക്കമുള്ളവർക്കെതിരെ പരാതി നൽകിയത്.

ചോദ്യം ചെയ്യാനായി സൈബർ പൊലീസ് വിളിച്ചുവരുത്തിയ ശേഷമാണ് കസ്റ്റഡിയിൽ എടുത്തത്. തുടർന്ന് എആർ ക്യാമ്പിലേക്ക് മാറ്റി. രാഹുൽ ഉൾപ്പെടെ നാലുപേരുടെ ഫെയ്സ്ബുക്ക് പോസ്റ്റുകളുടെ ലിങ്കാണ് യുവതി പരാതിക്കൊപ്പം നൽകിയത്. തിരുവനന്തപുരം സൈബർ സ്റ്റേഷനിലാണ് കേസെടുത്തത്. യുവതിക്കെതിരെ അപകീർത്തികരമായ ചിത്രങ്ങളും വിഡിയോകളും പ്രചരിക്കുന്നതായും പരാതിയുണ്ട്.

പരാതിക്കാരിക്ക് എതിരെ നടക്കുന്ന സൈബർ ആക്രമണത്തിനെതിരെ നടപടി സ്വീകരിക്കാൻ എഡിജിപി ജില്ലാ പൊലീസ് മേധാവികൾക്ക് നിർദ്ദേശം നൽകിയിരുന്നു. രാഹുലിനെതിരെ മൊഴി നൽകിയതിന് പിന്നാലെയാണ് തനിക്കെതിരെ നടക്കുന്ന സൈബർ ആക്രമണങ്ങളെക്കുറിച്ച് യുവതി പരാതി നൽകിയത്.