കോണ്‍ഗ്രസിന് പാര പണിയുന്നത് പതിവാക്കി ‘വീക്ഷണം’; രാഹുലിന് രക്തസാക്ഷി പരിവേഷം നല്‍കിയത് ബോധപൂര്‍വ്വമോ എന്ന് അന്വേഷണം
പാര്‍ട്ടി ചിലവില്‍ കോണ്‍ഗ്രസിനിട്ട് പണി കൊടുക്കുന്ന വിശ്വസ്ത സ്ഥാപനമായി മാറിയിരിക്കുകയാണ് മുഖപത്രം ‘വീക്ഷണം’. കോണ്‍ഗ്രസ് നേതൃത്വം ഏകകണ്ഠമായി തീരുമാനിച്ച് ലൈംഗികാരോപണം നേരിടുന്ന രാഹുല്‍ മാങ്കൂട്ടത്തിലിനെ പ്രാഥമിക അംഗത്വത്തില്‍ നിന്ന് സസ്‌പെന്റ് ചെയ്തിരിക്കെ, ഇത് തെല്ലും പരിഗണിക്കാതെ അയാളെ വെള്ളപൂശി എഡിറ്റോറിയല്‍ എഴുതിയ വീക്ഷണം നടപടി വിവാദമായിരിക്കുകയാണ്. ഇതാദ്യമായല്ല പാര്‍ട്ടി നിലപാടിന് വിരുദ്ധമായി വീക്ഷണം എഡിറ്റോറിയല്‍ എഴുതുന്നത്. കേരള കോണ്‍ഗ്രസ് മാണി ഗ്രൂപ്പിനെ യുഡിഎഫിലേക്ക് ക്ഷണിച്ചു കൊണ്ട് ഈ വര്‍ഷം മെയ് മാസത്തില്‍ മുഖപ്രസംഗം എഴുതിയതും വിവാദമായിരുന്നു.
“കഴുത്തോളം മാലിന്യത്തില്‍ മുങ്ങിനില്‍ക്കുന്ന സിപിഎം, കോണ്‍ഗ്രസിന്റെ കുപ്പായത്തില്‍ തെറിച്ച ചാണകത്തുള്ളി കണ്ട് മൂക്ക് പൊത്തുന്നതു പോലെയാണ് രാഹുല്‍ മാങ്കൂട്ടത്തിലിനെ ചൂണ്ടിക്കാട്ടി സദാചാര പ്രസംഗം നടത്തുന്നത്. രാഷ്ട്രീയ ഗൂഢാലോചനയുടെ ഇരയാണ് രാഹുല്‍. ഒരുപറ്റം ചെറുപ്പക്കാര്‍ കോണ്‍ഗ്രസില്‍ വളര്‍ന്നു വരുന്നത് സിപിഎമ്മില്‍ ഭീതി പടര്‍ത്തിയിരിക്കുകയാണ്. അതാണ് ഇത്തരം ആരോപണങ്ങളുടെ അടിസ്ഥാനം”; ഇന്നത്തെ മുഖപ്രസംഗത്തില്‍ വീക്ഷണം പറയുന്നു. പ്രതിപക്ഷ നേതാവും കെപിസിസി പ്രസിഡൻ്റും അടക്കം നേതാക്കളെല്ലാം രാഹുലിനെ തള്ളിപ്പറയാൻ മത്സരിക്കുകയാണ്; പ്രത്യേകിച്ച് പരാതിക്കാരി തന്നെ രംഗത്തെത്തി കഴിഞ്ഞ പുതിയ സാഹചര്യത്തിൽ. ഇതൊന്നും പരിഗണിക്കാതെയുളള പാർട്ടി പത്രത്തിൻ്റെ ഈ നീക്കം മുതിര്‍ന്ന നേതാക്കള്‍ എല്ലാവരും പാടേ തള്ളിക്കളഞ്ഞു.
“നാല് പതിറ്റാണ്ടിലേറെക്കാലം തിരുവിതാംകൂറിലെ കര്‍ഷകര്‍ക്ക് അവകാശ ബോധത്തിന്റെയും സംഘബോധത്തിന്റെയും സൂക്തങ്ങളും പ്രയോഗങ്ങളും പഠിപ്പിച്ച കെഎം മാണിയുടെ മകന് കര്‍ഷക രാഷ്ട്രീയത്തിന്റെ നഴ്‌സറി പാഠങ്ങള്‍ പോലും വശമില്ല. എതിരാളികള്‍ മനസ്സില്‍ കാണുന്നത് മാനത്ത് കാണുന്ന അതീവ കൗശലക്കാരനായ രാഷ്ട്രീയക്കാരനായിരുന്നു കെ.എം മാണി. അത്തരമൊരു മനസ്സോ മാനമോ കൗശലമോ ഇല്ലാത്ത ജോസ് കെ മാണി സിപി എമ്മിന്റെ അരക്കില്ലത്തില്‍ കിടന്ന് വെന്തുരുകാതെ യുഡിഎഫിലേക്ക് തിരിച്ചുവരുന്നതാണ് നല്ലത്” -ഇങ്ങനെ ആയിരുന്നു അന്നത്തെ എഡിറ്റോറിയല്‍. കോണ്‍ഗ്രസിലോ യുഡിഎഫിലോ ഇക്കാര്യത്തിൽ ഒരു ചര്‍ച്ച പോലും നടക്കാത്ത സമയത്തായിരുന്നു ഇത്.
യാതൊരുവിധ പ്രൊഫഷണലിസമോ, അതിലുപരി പാര്‍ട്ടി നയങ്ങളെക്കുറിച്ച് ബോധ്യങ്ങളോ ഇല്ലാതെ തോന്നുംപടി മാധ്യമ നിലപാടുകള്‍ സ്വീകരിക്കുന്നത് വീക്ഷണത്തില്‍ പതിവായിരിക്കുകയാണ്. കെപിസിസി വൈസ് പ്രസിഡൻ്റ് ജെയ്‌സണ്‍ ജോസഫാണ് വീക്ഷണത്തിന്റെ എഡിറ്റര്‍. അപവാദങ്ങളില്‍ പതറാതെയും വ്യക്തിഹത്യയില്‍ തകരാതെയും ജാഗ്രതയോടെ മുന്നോട്ടു പോകണമെന്ന് രാഹുലിനോട് ആഹ്വാനം ചെയ്യുന്ന മുഖപ്രസംഗം സൃഷ്ടിക്കുന്ന നാണക്കേടിനെക്കുറിച്ച് മറുപടി പറയാന്‍ പ്രതിപക്ഷ നേതാവടക്കം നേതാക്കള്‍ പാടുപെടുകയാണ്.
വീക്ഷണത്തിന്റെ മുഖപ്രസംഗത്തെ പാടെ തള്ളുകയാണ് കെപിസിസി പ്രസിഡന്റ് സണ്ണി ജോസഫ് ചെയ്തിരിക്കുന്നത്. പാര്‍ട്ടി നിലപാടിന് എതിരാണ് മുഖപ്രസംഗത്തില്‍ പറഞ്ഞിരിക്കുന്ന കാര്യങ്ങള്‍. ഒരിക്കലും വീക്ഷണം പത്രത്തില്‍ വരാന്‍ പാടില്ലാത്ത കാര്യങ്ങളാണ്. തിരുത്താന്‍ ആവശ്യപ്പെട്ടിട്ടുണ്ട് എന്നും സണ്ണി ജോസഫ് വ്യക്തമാക്കി. അതേസമയം പാര്‍ട്ടി പ്രതിസന്ധിയില്‍ ആയിരിക്കെ രാഹുലിനെ വെള്ളപൂശിയത് നിഷ്‌കളങ്കമല്ലെന്ന് തന്നെയാണ് നേതൃത്വത്തിന്റെ നിഗമനം. അതുകൊണ്ട് തന്നെ ഇക്കാര്യത്തില്‍ അനൗപചാരികമായ അന്വേഷണം നടത്താന്‍ ധാരണയായി എന്നും സൂചനയുണ്ട്.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
