എയര്‍ഷോയ്ക്കിടെ ഇന്ത്യയുടെ ‘തേജസ്’ തകര്‍ന്നുവീണു; പൈലറ്റിന് വീരമൃത്യു

ദുബായ് എയര്‍ ഷോയ്ക്കിടെ തേജസ് യുദ്ധവിമാനം തകര്‍ന്നു വീണു. ദുബായ് സമയം ഉച്ചയ്ക്ക് 2.10ഓടെയാണ് അല്‍ മക്തൂം അന്താരാഷ്ട്ര വിമാനത്താവളത്തിന് സമീപം അപകടമുണ്ടായത്. വ്യോമസേനയുടെ പൈലറ്റ് മരിച്ചു.

ഇന്ത്യ തദ്ദേശീയമായി വികസിപ്പിച്ച യുദ്ധവിമാനമാണ് തേജസ്. ഹിന്ദുസ്ഥാന്‍ എയ്‌റോനോട്ടിക്‌സ് ലിമിറ്റഡ് ആണ് നിര്‍മിക്കുന്നത്. ഒരു പൈലറ്റ് മാത്രമുള്ള വിമാനം ഇന്ത്യയുടെ അഭിമാനമായി അവതരിപ്പിച്ചതാണ്.

ആദ്യ റൗണ്ട് അഭ്യാസ പ്രകടനം പൂര്‍ത്തിയാക്കിയതിനു തൊട്ടുപിന്നാലെയാണ് അപകടം ഉണ്ടായത്. ടീമായുള്ള പ്രകടനം പൂര്‍ത്തിയാക്കിയ ശേഷം ഒറ്റയ്ക്കുള്ള പ്രകടനം നടത്തുമ്പോഴാണ് ദുരന്തമുണ്ടായത്.

പറന്നെത്തിയ വിമാനം കരണംമറിഞ്ഞതോടെ നിയന്ത്രണം നഷ്ടമായി താഴേയ്ക്ക് പതിക്കുകയായിരുന്നു. ഉടന്‍ തന്നെ അഗ്നിഗോളമായി മാറി. പിന്നാലെ എയര്‍ ഷോ നിര്‍ത്തിവയ്ക്കുകയും ചെയ്തു.