ഇന്ത്യയുടെ കുതിപ്പിൽ വിറളിപൂണ്ട് ഭീകരർ! ‘ബീറ്റിംഗ് റിട്രീറ്റിന്’ ഖലിസ്ഥാൻ ഭീഷണി

ഇന്ത്യയും യൂറോപ്യൻ യൂണിയനും തമ്മിൽ ഒപ്പുവെച്ച ചരിത്രപരമായ സ്വതന്ത്ര വ്യാപാര കരാറിൽ പ്രകോപിതരായി ഖലിസ്ഥാൻ ഭീകരവാദികൾ. ജനുവരി 29ന് ഡൽഹിയിൽ നടക്കാനിരിക്കുന്ന ‘ബീറ്റിംഗ് റിട്രീറ്റ്’ ചടങ്ങ് ലക്ഷ്യം വയ്ക്കുമെന്ന് നിരോധിത സംഘടനയായ സിഖ് ഫോർ ജസ്റ്റിസ് (SFJ) തലവൻ ഗുർപത്വന്ത് സിംഗ് പന്നൂൻ ഭീഷണി മുഴക്കി. ഇതേത്തുടർന്ന് രാജ്യത്തെ രഹസ്യാന്വേഷണ ഏജൻസികൾ കടുത്ത ജാഗ്രതാ നിർദ്ദേശം നൽകി.

ഇന്ത്യയും യൂറോപ്പും തമ്മിലുള്ള സാമ്പത്തിക ബന്ധം തകർക്കാനാണ് ഭീകരവാദികളുടെ ശ്രമം. ഈ വ്യാപാര കരാറിനെ ‘ഭീകരവാദ കരാർ’ എന്നാണ് പന്നൂൻ വിശേഷിപ്പിച്ചത്. റിപ്പബ്ലിക് ദിന ചടങ്ങുകളിൽ അതിഥികളായി എത്തിയ യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്‌നെയും യൂറോപ്യൻ കൗൺസിൽ പ്രസിഡന്റ് അന്റോണിയോ കോസ്റ്റയെയും പന്നൂൻ വിമർശിച്ചു. ഇന്ത്യയുമായുള്ള ബന്ധം യൂറോപ്പിന് ദോഷം ചെയ്യുമെന്നാണ് ഇവർ പ്രചരിപ്പിക്കുന്നത്.

ഇന്ത്യയുടെ നയതന്ത്ര വിജയങ്ങളെ തകർക്കാനും അന്താരാഷ്ട്ര തലത്തിൽ ശ്രദ്ധ പിടിച്ചുപറ്റാനുമുള്ള പതിവ് തന്ത്രമാണിതെന്ന് രഹസ്യാന്വേഷണ വിഭാഗം വ്യക്തമാക്കുന്നു. ഇത്തരം പ്രസ്താവനകൾ രാഷ്ട്രീയ നിലപാടുകളല്ല, മറിച്ച് അക്രമത്തിനുള്ള ആഹ്വാനമാണെന്ന് സുരക്ഷാ ഉദ്യോഗസ്ഥർ പറഞ്ഞു. റിപ്പബ്ലിക് ദിനത്തോടനുബന്ധിച്ചുള്ള ചടങ്ങുകൾ തടസ്സപ്പെടുത്താൻ വിദേശത്തിരുന്ന് ഖലിസ്ഥാനി ഗ്രൂപ്പുകൾ ഗൂഢാലോചന നടത്തുന്നുണ്ടെന്നാണ് വിവരം.

റിപ്പബ്ലിക് ദിനാഘോഷങ്ങളുടെ സമാപനം കുറിച്ച് ജനുവരി 29ന് വൈകുന്നേരം വിജയ് ചൗക്കിൽ നടക്കുന്ന വർണ്ണാഭമായ ചടങ്ങാണ് ബീറ്റിംഗ് റിട്രീറ്റ്. സൈനിക ബാൻഡുകളുടെ പ്രകടനമാണ് ഇതിന്റെ പ്രധാന ആകർഷണം. ഭീഷണി നിലനിൽക്കുന്ന സാഹചര്യത്തിൽ ഡൽഹിയിലും പരിസര പ്രദേശങ്ങളിലും സുരക്ഷ ശക്തമാക്കിയിട്ടുണ്ട്.