തായ്‌ലൻഡ് പ്രധാനമന്ത്രിയെ പുറത്താക്കി; നടപടി വിവാദ ഫോൺ സംഭാഷണം ചോർന്നതിന് പിന്നാലെ

വിവാദ ഫോൺ സംഭാഷണത്തെ തുടർന്ന് തായ്‌ലൻഡ് പ്രധാനമന്ത്രി പെയ്‌തോങ്താന്‍ ഷിനവത്രയെ പുറത്താക്കി. ധാർമ്മിക ലംഘനം നടത്തിയെന്ന് കണ്ടെത്തിയതിനെ തുടർന്നാണ് പുറത്താക്കൽ. തായ്‌ലൻഡ് ഭരണഘടനാ കോടതിയുടേതാണ് നടപടി. കംബോഡിയയുടെ മുൻ നേതാവ് ഹുൻ സെന്നുമായുള്ള വിവാദ ഫോൺ സംഭാഷണം പുറത്തു വന്നതിനു പിന്നാലെയാണ് കടുത്ത നടപടി.

39 കാരിയായ പെയ്‌തോങ്താന്‍ രാജ്യത്തെ ഏറ്റവും പ്രായം കുറഞ്ഞ പ്രധാനമന്ത്രിയാണ്. വെറും ഒരു വർഷം മാത്രമാണ് പെയ്‌തോങ്താന് അധികാരത്തിലിരിക്കാൻ സാധിച്ചത്. രണ്ടു പതിറ്റാണ്ടുകളായി തായ്‌ലൻഡ് രാഷ്ട്രീയം ഭരിച്ചിരുന്ന ഷിനവത്ര കുടുംബത്തിന് കനത്ത പ്രഹരമാണ് കോടതി വിധിയിലൂടെ നേരിടേണ്ടി വന്നത്.

പെയ്തോങ്താന് തിരിച്ചടിയായത് കംബോഡിയൻ നേതാവ് ഹുൻ സെന്നുമായുള്ള ഫോൺ സംഭാഷണം ചോർന്നതാണ്. ടെലിഫോൺ സംഭഷണത്തിൽ ‌പെയ്‌തോങ്താന്‍ ധാർമ്മിക നിയമങ്ങൾ ലംഘിച്ചുവെന്ന് കോടതി കണ്ടെത്തി. ഫോൺ കോളിൽ പെയ്തോങ്താൻ, ഹുൻ സെന്നിനെ ‘അങ്കിൾ’ എന്ന് വിളിക്കുകയും ചെയ്തു. അദ്ദേഹത്തിന്റെ അഭ്യർത്ഥനകൾ പരിപാലിക്കുമെന്ന് വാഗ്ദാനവും ചെയ്തു. കൂടാതെ സ്വന്തം സൈന്യത്തെ വിമർശിക്കുകയും ചെയ്തു.

കംബോഡിയയുമായുള്ള അതിർത്തി സംഘർഷങ്ങൾ രൂക്ഷമാകുന്ന സാഹചര്യത്തിലാണ് പ്രധാനമന്ത്രിയുടെ പരാമർശം എന്നതും ശ്രദ്ധേയമാണ്. ഇതിനെതിരെ രൂക്ഷ വിമർശനമാണ് ഉയരുന്നത്. പരാമർശത്തിന് പിന്നാലെ പെതോങ്താൻ ക്ഷമാപണം നടത്തുകയും ചെയ്തു.