‘വിട്ടുവീഴ്ച ചെയ്യുന്നവർ തോൽക്കില്ല’; ലക്ഷ്യം തമിഴ്‌നാട് ഭരണം; എൻഡിഎ പാളയത്തിൽ തിരിച്ചെത്തി ടിടിവി ദിനകരൻ

തമിഴ്‌നാട് നിയമസഭാ തിരഞ്ഞെടുപ്പിന് മാസങ്ങൾ മാത്രം ബാക്കിനിൽക്കെ, മുൻ എംപിയും എംഎൽഎയുമായ ടിടിവി ദിനകരന്റെ നേതൃത്വത്തിലുള്ള അമ്മ മക്കൾ മുന്നേറ്റ കഴകം(AMMK) വീണ്ടും എൻഡിഎ സഖ്യത്തിൽ ചേർന്നു. എഐഎഡിഎംകെ നേതാവ് ഇ പളനിസ്വാമിയുമായി ഇടഞ്ഞതിനെ തുടർന്ന് മാസങ്ങൾക്ക് മുമ്പ് മുന്നണി വിട്ട ദിനകരൻ, കേന്ദ്ര ആഭ്യന്തര മന്ത്രി അമിത് ഷായുമായി നടത്തിയ കൂടിക്കാഴ്ചയ്ക്ക് ശേഷമാണ് മടങ്ങിവരവ് പ്രഖ്യാപിച്ചത്.

‘വിട്ടുവീഴ്ച ചെയ്യുന്നവർ ഒരിക്കലും പരാജയപ്പെടില്ല. ഇതൊരു പുതിയ തുടക്കമാണ്. തമിഴ്‌നാട്ടിൽ പുതിയ സർക്കാർ രൂപീകരിക്കാൻ ഞങ്ങൾ പരിശ്രമിക്കും. ത്യാഗം ചെയ്യുന്നവർ ഒരിക്കലും തകരില്ല. ജയലളിതയുടെ യഥാർത്ഥ അനുയായികൾ എന്ന നിലയിൽ ഞങ്ങൾ എല്ലാവരും ഒന്നിച്ചുനിന്ന് തമിഴ്‌നാട്ടിൽ ഭരണം പിടിക്കും’ എന്നാണ് മുന്നണിയിൽ തിരിച്ചെത്തിയ ശേഷം ദിനകരൻ മാധ്യമങ്ങളോട് പ്രതികരിച്ചത്.

തെക്കൻ തമിഴ്‌നാട്ടിലെ നിർണ്ണായകമായ ‘തേവർ’ സമുദായ വോട്ടുകൾ എൻഡിഎയിലേക്ക് കേന്ദ്രീകരിക്കാൻ ദിനകരന്റെ തിരിച്ചുവരവ് സഹായിക്കുമെന്ന് ബിജെപി കരുതുന്നു. വെള്ളിയാഴ്ച ചെന്നൈയ്ക്ക് സമീപം നടക്കുന്ന പ്രധാനമന്ത്രി നരേന്ദ്ര മോദിയുടെ പൊതുസമ്മേളനത്തിൽ ദിനകരൻ പങ്കെടുക്കും. എടപ്പാടി പളനിസ്വാമി, അൻപുമണി രാമദാസ്, ജികെ വാസൻ തുടങ്ങിയ പ്രമുഖ നേതാക്കളും ഈ ചടങ്ങിൽ അണിനിരക്കും.

തമിഴ് സിനിമാ താരം വിജയിയുടെ ‘തമിഴക വെട്രി കഴകം’ പോലുള്ള പുതിയ പാർട്ടികൾ തിരഞ്ഞെടുപ്പിൽ വെല്ലുവിളി ഉയർത്തുന്ന സാഹചര്യത്തിൽ, ദിനകരന്റെ മടങ്ങിവരവ് എൻഡിഎയ്ക്ക് വലിയ കരുത്താകുമെന്നാണ് വിലയിരുത്തപ്പെടുന്നത്.