തിരുമല ലഡ്ഡു കുംഭകോണത്തിൽ നിർണായക അറസ്റ്റ്; അന്വേഷണം ഉന്നതരിലേക്ക്

തിരുമല തിരുപ്പതി ക്ഷേത്രത്തിലെ ലഡ്ഡുവിൽ മായം ചേർത്ത കേസിൽ നിർണായക വഴിത്തിരിവ്. ക്ഷേത്രത്തിലെ ഉന്നത ഉദ്യോഗസ്ഥനാണ് പിടിലായത്. തിരുമല തിരുപ്പതി ദേവസ്ഥാനത്തെ (TTD) എക്സിക്യൂട്ടീവ് എഞ്ചിനീയർ ആർ‌എസ്‌എസ്‌വിആർ സുബ്രഹ്മണ്യം ആണ് അറസ്റ്റിലായത്.

കസ്റ്റഡിയിലെടുത്ത ഇദ്ദേഹത്തെ പിന്നീട് തിരുപ്പതിയിലെ റൂയ ആശുപത്രിയിൽ വൈദ്യപരിശോധനയ്ക്ക് വിധേയനാക്കി. സുബ്രഹ്മണ്യം മുമ്പ് TTD മാർക്കറ്റിംഗ് ജനറൽ മാനേജരായി സേവനമനുഷ്ഠിച്ചിട്ടുണ്ട്. ഇദ്ദേഹത്തിന്റെ അറസ്റ്റോടെ കേസിൽ ആകെ അറസ്റ്റിലായവരുടെ എണ്ണം 10 ആയി.

ശ്രീ വെങ്കടേശ്വര ക്ഷേത്രത്തിൽ ദിവസവും ഏകദേശം 4 ലക്ഷം ലഡ്ഡുകളാണ് തയ്യാറാക്കുന്നത്. ഇതിനായി 12,000-13,000 കിലോ നെയ്യ് ദിനംപ്രതി ആവശ്യമാണ്. മുൻ യുവജന ശ്രമിക റൈതു കോൺഗ്രസ് പാർട്ടി (YSRCP) ഭരണകാലത്താണ് ലഡ്ഡു നിർമ്മാണത്തിൽ മായം ചേർത്ത നെയ്യ് ഉപയോഗിച്ചെന്ന ആരോപണം ഉയർന്നത്. തെലുങ്ക് ദേശം പാർട്ടി (TDP) അധികാരത്തിൽ വന്ന ശേഷം മുഖ്യമന്ത്രി ചന്ദ്രബാബു നായിഡു കഴിഞ്ഞ വർഷം ലാബ് റിപ്പോർട്ട് പുറത്തുവിട്ടതോടെയാണ് കേസ് സജീവമായത്.

കേസ് അന്വേഷിക്കാൻ പ്രത്യേക അന്വേഷണ സംഘം (SIT) രൂപീകരിച്ചു. 2019 നും 2024 നും ഇടയിൽ ഏകദേശം 20 കോടി ലഡ്ഡുകൾ മായം ചേർത്ത നെയ്യ് ഉപയോഗിച്ചാണ് നിർമ്മിച്ചതെന്ന് SIT കണ്ടെത്തി. ഈ കാലയളവിൽ ഉൽപ്പാദിപ്പിച്ച ആകെ 48.76 കോടി ലഡ്ഡുകളിൽ, ഏകദേശം 40% ലഡ്ഡുകളിലും പാം ഓയിൽ, പാം കേർണൽ ഓയിൽ, മറ്റ് രാസവസ്തുക്കൾ എന്നിവ അടങ്ങിയിരുന്നു.

ഈ വർഷങ്ങളിൽ, അന്നത്തെ TTD ബോർഡ് നിരവധി ഡയറി വിതരണക്കാർക്ക് ഏകദേശം 250 കോടി രൂപ നൽകി. ഇതിൽ ഉത്തരാഖണ്ഡ് ഭോലെ ബാബ ഡയറി, തമിഴ്‌നാട് ഡിണ്ടിഗലിലെ എആർ ഡയറി, തിരുപ്പതിയിലെ പുന്നബക്കലുവിലെ വൈഷ്ണവി ഡയറി ഉത്തർപ്രദേശിലെ മാൽഗംഗ ഡയറീസ് തുടങ്ങിയ വിതരണക്കാരും ഉൾപ്പെടുന്നു.

ഈ വിതരണക്കാരിൽ നിന്ന് വാങ്ങിയ 1.61 കോടി കിലോഗ്രാം നെയ്യിൽ, 68 ലക്ഷം കിലോഗ്രാം നെയ്യ് മായം ചേർത്തതാണെന്ന് തിരിച്ചറിഞ്ഞു. മുൻ TTD ചെയർമാനും YSRCP എംപിയുമായ വൈ വി സുബ്ബ റെഡ്ഡിയെ SIT ഉദ്യോഗസ്ഥർ അടുത്തിടെ ഹൈദരാബാദിലെ വസതിയിൽ ചോദ്യം ചെയ്തിരുന്നു. അദ്ദേഹത്തിന്റെ മുൻ പേഴ്സണൽ അസിസ്റ്റന്റ് ചിന്ന അപ്പണ്ണയെ കേസിൽ നേരത്തെ തന്നെ അറസ്റ്റ് ചെയ്തിട്ടുണ്ട്.