സൈക്കിക് കോഴി രക്ഷപ്പെട്ടു പോകും; രാഹുല്‍ മാങ്കൂട്ടത്തിലിന്റെ അറസ്റ്റിലെ പോലീസ് വീഴ്ചകള്‍ പറഞ്ഞ് മുന്‍ ഡിജിപി സെന്‍കുമാര്‍

മൂന്നാമത്തെ ബലാത്സംഗ പരാതിയില്‍ പാലക്കാട് എംഎല്‍എ അറസ്റ്റ് ചെയ്ത പ്രത്യേക അന്വേഷണസംഘത്തിന്റെ വീഴ്ചകള്‍ പറഞ്ഞ് മുന്‍ ഡിജിപി ടിപി സെന്‍കുമാര്‍. വിമര്‍ശനം എന്ന് ഉന്നയിക്കാതെ സൈക്കിക് കോഴിയെ പിടിക്കുമ്പോള്‍ ശ്രദ്ധിക്കേണ്ട നിയമപരമായ കാര്യങ്ങള്‍ എന്ന് വിശേഷണമാണ് ഇതിന് സെന്‍കുമാര്‍ നല്‍കിയിരിക്കുന്നത്. ഇത് പാലിച്ചില്ലെങ്കില്‍ കോഴി രക്ഷപ്പെട്ടു പോകും എന്നും അദ്ദേഹം ഫെയ്‌സ്ബുക്ക് പോസ്റ്റില്‍ പറയുന്നു.

വിദേശത്ത് നിന്ന് പരാതി അയച്ച പരാതിക്കാരി സ്റ്റേഷനില്‍ വന്നു ഇ മെയില്‍ ഒപ്പിട്ടു നല്‍കിയോ എന്നും എങ്കില്‍ മാത്രമല്ലേ കേസെടുക്കാന്‍ കഴിയുകയുള്ളൂ എന്നാണ് സെന്‍കുമാര്‍ ഉന്നയിക്കുന്ന പ്രധാന വാദം. നിയമ വിരുദ്ധമായിട്ടാണ് കേസ് രജിസ്റ്റര്‍ ചെയ്തതെങ്കില്‍ പോലും 24 മണിക്കൂറിനകം അതിജീവിതയെ വൈദ്യ പരിശോധന നടത്തിയോ എന്ന പ്രസക്തമായ കാര്യവും മുന്‍ ഡിജിപി പോലീസ്ുകാരോട് ചോദിക്കുന്നുണ്ട്.

മുഖ്യമന്ത്രിയോട് പരാതിക്കാരി നടത്തുന്ന പരിദേവനം മാത്രമ പോര ക്രിമിനല്‍ നടപടിക്ക്. ക്രിമിനല്‍ നടപടിക്രമങ്ങള്‍ പാലിച്ചില്ലെങ്കില്‍ കോഴി രക്ഷപെട്ടു പോകും.. അത് പോലീസ് അറിയുക എന്ന മുന്നറിയിപ്പുമായാണ് കുറിപ്പ് അവസാനിപ്പിച്ചിരിക്കുന്നത്.

ഫെയ്‌സ്ബുക്ക് പോസ്റ്റിന്റെ പൂര്‍ണ്ണരൂപം

കോഴിയും പോലീസും ക്രിമിനല്‍ നിയമങ്ങളും
ഒരു സൈക്കിക് കോഴിയെ പോലീസ് പിടിക്കുമ്പോള്‍ ശ്രദ്ധിക്കേണ്ട നിയമപരമായ കാര്യങ്ങള്‍ , അത് താഴെ പറയുന്നവയാണ്.
പോലീസിനും കോടതിക്കും ബലാത്സംഗ പരാതിയിലെ ബാലപാഠങ്ങള്‍ അറിയേണ്ടേ?
ഒരു ബലാത്സംഗ പരാതി കാനഡയില്‍ നിന്നും ഇ മെയില്‍ ആയി പരാതിക്കാരി സ്റ്റേഷന്‍ ഹൌസ് ഓഫീസര്‍ക്കു ബി എന്‍ എസ് എസ്, വകുപ്പ് 173(1)(ii) ലഭിച്ചിട്ടുണ്ടോ?
അപ്രകാരം ലഭിച്ചിട്ടുണ്ടെങ്കില്‍, മൂന്നാം ദിനം പരാതിക്കാരിയെ വിളിച്ചു വരുത്തുന്നതിനു പോലീസ് ഓഫീസര്‍ റിപ്ലൈ മെയില്‍ അയച്ചിട്ടുണ്ടോ?
റിപ്ലൈ മെയില്‍ അയച്ചിട്ടുണ്ടെങ്കില്‍, പരാതിക്കാരി സ്റ്റേഷനില്‍ വന്നു ഇ മെയില്‍ ഒപ്പിട്ടു നല്‍കിയോ?
അങ്ങിനെ നല്‍കിയാല്‍ മാത്രം അല്ലേ കേസ് രജിസ്റ്റര്‍ ചെയ്യാന്‍ കഴിയൂ?
ഇനി പോട്ടെ, നിയമ വിരുദ്ധമായിട്ടാണ് കേസ് രജിസ്റ്റര്‍ ചെയ്തതെങ്കില്‍ പോലും, പരാതിക്കാരിയെ ബി എന്‍ എസ് എസ്, വകുപ്പ് 184(1) പ്രകാരം കേസ് എടുത്ത തിയതി മുതല്‍ 24 മണിക്കൂറിനകം അതിജീവിതയെ വൈദ്യ പരിശോധന നടത്തിയോ?
പോട്ടെ, അങ്ങിനെ വൈദ്യ പരിശോധന പോലും നടത്താതെ എങ്ങിനെ ആണ് വകുപ്പ് 35(1)((b) പ്രകാരം പരാതി വിശ്വാസ യോഗ്യം ആകുക?
എങ്ങിനെ ആണ് വകുപ്പ് 47(1) പ്രകാരം അറസ്റ്റിന്റെ കാരണങ്ങള്‍ അറിയിക്കാന്‍ കഴിയുക?
എങ്ങിനെ ആണ് 187(1) പ്രകാരം കോടതിക്ക് റിമാന്‍ഡ് ചെയ്യാന്‍ കഴിയുക?
എങ്ങിനെ ആണ് മുഖ്യമന്ത്രിയോട് പരാതിക്കാരി നടത്തുന്ന പരിദേവനം ക്രിമിനല്‍ നടപടി ആവുക?
ഈ ക്രിമിനല്‍ നടപടിക്രമങ്ങള്‍ പാലിച്ചില്ലെങ്കില്‍ കോഴി രക്ഷപെട്ടു പോകും.. അത് പോലീസ് അറിയുക.

സെന്‍കുമാര്‍