റഷ്യൻ എണ്ണ വാങ്ങിയാൽ 500% നികുതി; ഇന്ത്യയെ ലക്ഷ്യമിട്ട് ട്രംപിന്റെ പുതിയ ബില്ലിന് പച്ചക്കൊടി

റഷ്യക്കെതിരായ ഉപരോധം ശക്തമാക്കുന്നതിന്റെ ഭാഗമായി ഇന്ത്യയുൾപ്പെടെയുള്ള രാജ്യങ്ങൾക്ക് കനത്ത പ്രഹരമേൽപ്പിക്കുന്ന പുതിയ നീക്കവുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. റഷ്യയിൽ നിന്ന് എണ്ണ വാങ്ങുന്നത് തുടരുന്ന രാജ്യങ്ങളിൽ നിന്നുള്ള ഇറക്കുമതിക്ക് 500 ശതമാനം വരെ താരിഫ് ചുമത്താനുള്ള നിർദ്ദേശത്തിനാണ് ട്രംപ് പിന്തുണ നൽകിയിരിക്കുന്നത്. ഇന്ത്യയെയും ചൈനയെയും ലക്ഷ്യം വെച്ചാണ് ഈ നീക്കം.

റഷ്യയുടെ വരുമാന സ്രോതസ്സുകൾ പൂർണ്ണമായും തടയുക എന്നതാണ് ഈ ബില്ലിന്റെ ലക്ഷ്യം. റഷ്യൻ എണ്ണ വാങ്ങുന്നതിലൂടെ ആ രാജ്യം യുദ്ധത്തിനുള്ള പണം കണ്ടെത്തുന്നു എന്നാണ് അമേരിക്കയുടെ വാദം. ഇതിനെ പ്രതിരോധിക്കാൻ, റഷ്യയിൽ നിന്ന് എണ്ണ വാങ്ങുന്ന രാജ്യങ്ങൾ അമേരിക്കയിലേക്ക് കയറ്റുമതി ചെയ്യുന്ന ഉൽപ്പന്നങ്ങൾക്ക് 500% വരെ നികുതി വർദ്ധിപ്പിക്കാനാണ് നിർദ്ദേശം. യുക്രൈൻ യുദ്ധത്തിന് ശേഷം റഷ്യയിൽ നിന്ന് ഏറ്റവും കൂടുതൽ ഡിസ്കൗണ്ട് നിരക്കിൽ എണ്ണ വാങ്ങുന്ന രാജ്യങ്ങളിലൊന്നാണ് ഇന്ത്യ. ഇത് ഇന്ത്യയുടെ ഇന്ധനവില നിയന്ത്രിക്കാൻ സഹായിച്ചിരുന്നു.

Also Read : ട്രംപിന്റെ താരിഫ് ഭീഷണി ചീറ്റി; റെക്കോഡിട്ട് ഇന്ത്യൻ കയറ്റുമതി

അമേരിക്ക ഇന്ത്യയുടെ ഏറ്റവും വലിയ വ്യാപാര പങ്കാളിയാണ്. 500% താരിഫ് നിലവിൽ വന്നാൽ ഇന്ത്യയിൽ നിന്നുള്ള ഉൽപ്പന്നങ്ങൾ അമേരിക്കൻ വിപണിയിൽ അമിത വിലയാകുകയും ഇന്ത്യൻ കയറ്റുമതി മേഖല തകരുകയും ചെയ്യും. ട്രംപുമായി അടുത്ത ബന്ധം പുലർത്തുന്ന ഇന്ത്യയ്ക്ക് ഈ നീക്കം വലിയ നയതന്ത്ര വെല്ലുവിളിയാകും.

അമേരിക്ക ഫസ്റ്റ് എന്ന നയത്തിന്റെ ഭാഗമായി ട്രംപ് നേരത്തെയും താരിഫ് യുദ്ധങ്ങൾ നടത്തിയിട്ടുണ്ട്. റഷ്യയെ സാമ്പത്തികമായി ഒറ്റപ്പെടുത്താൻ മിത്രരാജ്യങ്ങൾ സഹകരിച്ചില്ലെങ്കിൽ കടുത്ത നടപടി നേരിടേണ്ടി വരുമെന്ന വ്യക്തമായ സൂചനയാണ് ഇതിലൂടെ ട്രംപ് നൽകുന്നത്. ചൈനയെയും ഇതിലൂടെ സമ്മർദ്ദത്തിലാക്കാൻ ട്രംപ് ലക്ഷ്യമിടുന്നു.

തങ്ങളുടെ ഊർജ്ജ സുരക്ഷയ്ക്ക് മുൻഗണന നൽകുമെന്നും കുറഞ്ഞ നിരക്കിൽ എണ്ണ ലഭിക്കുന്നിടത്ത് നിന്ന് അത് വാങ്ങുമെന്നുമാണ് ഇന്ത്യയുടെ നിലപാട്. എന്നാൽ അമേരിക്ക നിയമനിർമ്മാണം നടത്തിയാൽ ഇന്ത്യയ്ക്ക് റഷ്യയുമായുള്ള എണ്ണ വ്യാപാരത്തിൽ പുനർചിന്തനം നടത്തേണ്ടി വന്നേക്കാം.