ഇളയ ദളപതി ജനങ്ങൾക്കിടയിലേക്ക്; വിജയ് സ്റ്റാലിന് വെല്ലുവിളിയോ?

‘നിങ്ങളുടെ വിജയ് ഇതാ വരുന്നു’ എന്ന മുദ്രാവാക്യം ഉയർത്തിക്കൊണ്ട് ടിവികെ നേതാവ് വിജയുടെ ആദ്യ സംസ്ഥാന പര്യടനം 10.35-ന് തിരുച്ചിറപ്പള്ളിയിൽ നിന്ന് ആരംഭിക്കും. നിയമസഭാ തിരഞ്ഞെടുപ്പിനുള്ള മുന്നോടിയായി ജനങ്ങൾക്കിടയിലേക്ക് ഇറങ്ങി ചെല്ലാനുള്ള നീക്കത്തിലാണ് വിജയ്. എല്ലാ ജില്ലകളിലൂടെയും കടന്നുപോകുന്ന യാത്രയിൽ തമിഴ്നാട്ടുകാരായ തന്റെ കുടുംബാംഗങ്ങളെ നേരിട്ട് കാണുമെന്ന് വിജയ് സോഷ്യൽ മീഡിയയിൽ കുറിച്ചു. ജനങ്ങളുടെ മനസ്സറിഞ്ഞുകൊണ്ട് മനസാക്ഷിക്കു നിരക്കുന്ന രാഷ്ട്രീയമാണ് ടിവികെ മുന്നോട്ടുവയ്ക്കുന്നതെന്നും വിജയ് സോഷ്യൽ മീഡിയയിൽ കുറിച്ചു.

Also Read : ഇളയ ദളപതി to തമിഴ്‌നാട് CM? മുഖ‍്യമന്ത്രി സ്ഥാനാർഥിയായി നടൻ വിജയ്‌; ബിജെപിയെ അടുപ്പിക്കില്ല

നിയമസഭാ തിരഞ്ഞെടുപ്പ് ആരംഭിക്കാൻ മാസങ്ങൾ മാത്രം ബാക്കിനിൽക്കെ ഇലക്ഷനിൽ വലിയ സ്വാധീനമൊന്നും ചെലുത്താൻ വിജയിക്ക് കഴിയില്ല എന്നാണ് വിലയിരുത്തൽ. പക്ഷെ എംജിആറിന്റെ ചിത്രം പതിപ്പിച്ച കാരവാനുമായി ജനങ്ങൾക്കിടയിലേക്ക് എത്തിക്കൊണ്ട് താൻ എംജിആറിന്റെ പിൻഗാമി എന്ന സന്ദേശം ആളുകൾക്കിടയിലേക്ക് എത്തിക്കാനുള്ള വിജയുടെ ശ്രമങ്ങൾ ഫലം കാണുമെന്ന് ആത്മവിശ്വാസത്തിലാണ് ടിവികെ അംഗങ്ങൾ. ഡിസംബർ 20 വരെ വിജയുടെ സംസ്ഥാന പര്യടനം തുടരും. മധുരയിലാണ് സമാപന സമ്മേളനം. തിരുച്ചിറപ്പള്ളിയിൽ ചത്തിരം ബസ് സ്റ്റാൻഡാണ് ഉദ്ഘാടന വേദിയായി ടിവികെ നിശ്ചയിച്ചിരിക്കുന്നത്. എന്നാൽ പോലീസ് അനുമതി നൽകാത്തതുകൊണ്ടാണ് ഗാന്ധി മാർക്കറ്റിലേക്കു മാറ്റി .

Also Read : എല്ലാവർക്കും എംജിആർ ആകാനാവില്ല; വിജയ്‌യുടെ രാഷ്ട്രീയ പ്രവേശനത്തെ കളിയാക്കി ഡിഎംകെ നേതാവ്

സിനിമയും രാഷ്ട്രീയവും ഇഴചേർന്നു കിടക്കുന്ന തമിഴ് രാഷ്ട്രീയത്തിൽ കൃത്യമായി ഇടം കണ്ടെത്താൻ വിജയ്ക്ക് കഴിഞ്ഞിട്ടുണ്ടെന്നാണ് രാഷ്ട്രീയ നിരീക്ഷകരുടെയും വിലയിരുത്തൽ. കരുണാനിധിയും എംജിആറും ജയലളിതയും ഒഴിഞ്ഞിട്ട ഇടം വിജയ് കരസ്ഥമാക്കിയാൽ അത് സ്റ്റാലിൻ എന്ന രാഷ്ട്രീയ നേതാവിന് വലിയ തിരിച്ചടിയാകുമെന്നും വിലയിരുത്തപ്പെടുന്നു. ടിവികെയുടെ പൊതുയോഗങ്ങൾക്കും സമ്മേളനങ്ങൾക്കും സ്റ്റാലിൻ ഭരണകൂടം പ്രതിസന്ധി സൃഷ്ടിക്കുന്നത് വളർന്നുവരുന്ന എതിരാളിയെ ഭയക്കുന്നത് കൊണ്ടാണെന്നാണ് ടിവികെ നേതൃത്വം പറയുന്നത്.