വന്ദേഭാരത് ട്രെയിനിൽ വിദ്യാർത്ഥികളുടെ ആര്‍എസ്എസ് ഗണഗീതം; അന്വേഷണത്തിന് ഉത്തരവിട്ട് വിദ്യാഭ്യാസ മന്ത്രി

വന്ദേഭാരത് ട്രെയിനിലെ യാത്രയ്ക്കിടെ സ്കൂൾ വിദ്യാർത്ഥികൾ ആര്‍എസ്എസിന്‍റെ ഗണഗീതം പാടിയ സംഭവത്തിൽ അന്വേഷണത്തിന് ഉത്തരവിട്ട് വിദ്യാഭ്യാസ മന്ത്രി. പൊതുവിദ്യാഭ്യാസ ഡയറക്ടറോട് അന്വേഷിച്ച് അടിയന്തരമായി റിപ്പോർട്ട് സമർപ്പിക്കാൻ മന്ത്രി നിർദേശം നൽകി.

ഈ വിഷയം അതീവ ഗൗരവത്തോടെയാണ് കാണുന്നതെന്ന് വിദ്യാഭ്യാസ വകുപ്പ് അറിയിച്ചു. ഔദ്യോഗിക പരിപാടിയിൽ വിദ്യാർത്ഥികളെ പങ്കെടുപ്പിച്ചതിൽ ഏതെങ്കിലും തരത്തിലുള്ള വീഴ്ച സംഭവിച്ചിട്ടുണ്ടോ എന്നും പരിശോധിക്കും. പുതിയ എറണാകുളം ബെംഗളൂരു വന്ദേഭാരത് എക്‌സ്‌പ്രസ് ഉദ്ഘാടനയാത്രയിലാണ് വിദ്യാർത്ഥികൾ ഗണഗീതം ആലപിച്ചത്. ദക്ഷിണ റെയിൽവേ ഈ വീഡിയോ ‘ദേശഭക്തി ഗാനം’ എന്ന തലക്കെട്ടോടെ സോഷ്യൽ മീഡിയയിൽ പങ്കുവെച്ചിരുന്നു. എന്നാൽ ഇത് വിവാദമായതിനെ തുടർന്ന് പോസ്റ്റ് നീക്കം ചെയ്യുകയും പിന്നീട് വീണ്ടും പ്രസിദ്ധീകരിക്കുകയും ചെയ്തു.

അതേസമയം, ഈ വിവാദങ്ങളെ തള്ളി കേന്ദ്രമന്ത്രിമാരായ സുരേഷ് ഗോപിയും ജോർജ് കുര്യനും രംഗത്തെത്തി. കുട്ടികൾ പാടിയത് തീവ്രവാദ ഗാനമല്ലെന്നും നിഷ്‌കളങ്കമായി ആലപിച്ചതാണെന്നും ദേശഭക്തിയാണ് ഗാനത്തിന്റെ ആശയമെന്നും അവർ പ്രതികരിച്ചു.