വിമാനം തകരുന്നതിന് മുൻപ് കോക്പിറ്റിൽ സംഭവിച്ചത് എന്ത്? സത്യമറിയാൻ ‘ബ്ലാക്ക് ബോക്സ്’ പരിശോധനയിലേക്ക്!

മഹാരാഷ്ട്ര ഉപമുഖ്യമന്ത്രി അജിത് പവാറിന്റെ മരണത്തിന് ഇടയാക്കിയ വിമാനാപകടത്തിന്റെ കാരണം കണ്ടെത്താനുള്ള നിർണ്ണായക തെളിവായ ‘ബ്ലാക്ക് ബോക്സ്’ അന്വേഷണ സംഘം കണ്ടെടുത്തു. വിമാനത്തിലെ ഡാറ്റാ റെക്കോർഡറും കോക്പിറ്റിലെ സംഭാഷണങ്ങൾ രേഖപ്പെടുത്തുന്ന വോയ്‌സ് റെക്കോർഡറും ഇതിൽ ഉൾപ്പെടുന്നു.

കഴിഞ്ഞ ദിവസം രാവിലെ 8:45ഓടെ ബാരാമതി വിമാനത്താവളത്തിൽ ഇറങ്ങാൻ ശ്രമിക്കുന്നതിനിടെയാണ് വിഎസ്ആർ വെഞ്ചേഴ്‌സിന്റെ ലിയർജെറ്റ് വിമാനം തകർന്നത്. അജിത് പവാർ ഉൾപ്പെടെ അഞ്ച് പേരാണ് അപകടത്തിൽ മരിച്ചത്. എയർക്രാഫ്റ്റ് ആക്‌സിഡന്റ് ഇൻവെസ്റ്റിഗേഷൻ ബ്യൂറോയിലെ (AAIB) പ്രത്യേക സംഘം സ്ഥലത്തെത്തി ശാസ്ത്രീയ പരിശോധനകൾ ആരംഭിച്ചു. ബ്ലാക്ക് ബോക്സ് പരിശോധിക്കുന്നതിലൂടെ അപകടത്തിന്റെ കൃത്യമായ കാരണം വ്യക്തമാകും.

വിമാനം തകരുന്നതിന് തൊട്ടുമുമ്പ് പൈലറ്റുമാർ പരിഭ്രാന്തരായി സംസാരിച്ചതിന്റെ സൂചനകൾ ഉദ്യോഗസ്ഥർക്ക് ലഭിച്ചിട്ടുണ്ട്. മോശം കാലാവസ്ഥയും കാഴ്ചപരിധി കുറഞ്ഞതുമാണ് അപകടത്തിന് കാരണമെന്നാണ് പ്രാഥമിക നിഗമനം. മുംബൈയിൽ നിന്ന് തിരഞ്ഞെടുപ്പ് റാലികളിൽ പങ്കെടുക്കാനാണ് അജിത് പവാർ ബാരാമതിയിലേക്ക് തിരിച്ചത്. വിമാനം റൺവേയ്ക്ക് സമീപം തകർന്ന് വീണ് തീപിടിക്കുകയായിരുന്നു. അജിത് പവാറിനെ കൂടാതെ അദ്ദേഹത്തിന്റെ സുരക്ഷാ ഉദ്യോഗസ്ഥൻ, സഹായി, പൈലറ്റുമാരായ സുമിത് കപൂർ, ശാംഭവി പഥക് എന്നിവർക്കും ജീവൻ നഷ്ടമായി.