ദേശീയ അവാർഡിലെ അട്ടിമറി ബാലചന്ദ്രമേനോനോട് വെളിപ്പെടുത്തിയ ദേവേന്ദ്ര ഖണ്ഡേൽവാൾ ആരാണ്… അറിയാം ഈ ബഹുമുഖ പ്രതിഭയെ

കഥ, തിരക്കഥ, സംഭാഷണം, സംവിധാനം എന്നിങ്ങനെ മേനോൻ സിനിമകളിലെ ടൈറ്റിൽകാർഡ് പോലെ തന്നെയാണ് ദേവേന്ദ്ര ഖണ്ഡേൽവാളിൻ്റെ കാര്യവും. 50 വർഷത്തിലേറെ നീണ്ട സിനിമാ ജീവിതത്തിന് ഉടമ, ബഹുമുഖ പ്രതിഭ, സംവിധായകനായും നിർമ്മാതാവായും അഭിനേതാവായും തന്റേതായ വ്യക്തിമുദ്ര പതിപ്പിച്ചിട്ടുണ്ട്. ദേശീയ അന്തർദേശീയ തലങ്ങളിൽ കഴിവ് തെളിയിച്ച അദ്ദേഹം, സിനിമയിലും ടെലിവിഷൻ രംഗത്തും അറിയപ്പെടുന്ന വ്യക്തിത്വമാണ്. ബിസിനസ് അഡ്മിനിസ്‌ട്രേഷനിൽ ബിരുദാനന്തര ബിരുദം നേടിയ ശേഷമാണ് അദ്ദേഹം സിനിമാ മേഖലയിലേക്ക് കടന്നുവരുന്നത്.

Also Read: കെആർ മോഹനൻ ഇടപെട്ട് 1997ലെ ദേശീയ സിനിമാ അവാർഡ് അട്ടിമറിച്ചു!! തനിക്കുള്ള 3 അവാർഡ് ഇല്ലാതാക്കിയെന്ന് തെളിവുസഹിതം ബാലചന്ദ്രമേനോൻ

ബസു ചാറ്റർജി സംവിധാനം ചെയ്ത ക്ലാസിക് ചിത്രങ്ങളിലെ വേഷങ്ങളിലൂടെയാണ് ഖാണ്ഡേൽവാൾ പ്രശസ്തനായത്. 1976ൽ ഇറങ്ങിയ ‘ഛോട്ടി സി ബാത്ത്’ എന്ന ചിത്രത്തിലെ കഥാപാത്രം ഏറെ ശ്രദ്ധിക്കപ്പെട്ടു. പുറമെ, 1978-ലെ ‘ഖട്ടാ മീഠാ’, 1974-ലെ ‘ആവിഷ്‌കാർ’, 1975-ലെ ‘തുമ്ഹാരാ കല്ലൂ’ തുടങ്ങിയ ചിത്രങ്ങളിലും പ്രധാന വേഷങ്ങൾ കൈകാര്യം ചെയ്തു. കൂടാതെ, 1989ൽ പുറത്തിറങ്ങിയ ‘കമല കി മൗത്’, 1980ലെ ‘ഗൃഹ പ്രവേശ്’ തുടങ്ങിയ സിനിമകളിലും അഭിനയിച്ചു. ടെലിവിഷനിലും സജീവമായിരുന്ന അദ്ദേഹം ‘ബ്യോംകേഷ് ബക്ഷി’ എന്ന പ്രശസ്ത പരമ്പരയിലും അഭിനയിച്ചിട്ടുണ്ട്.

സിനിമകളിൽ അഭിനയിക്കുന്നതിനൊപ്പം തന്നെ, പ്രമുഖ ചലച്ചിത്ര സ്ഥാപനങ്ങളുമായി ചേർന്ന് ചലച്ചിത്ര നിർമ്മാണത്തിന്റെ വിവിധ വശങ്ങളിൽ പ്രവർത്തിക്കുകയും, ഒട്ടേറെ ഡോക്യുമെന്ററികളും ഹ്രസ്വചിത്രങ്ങളും നിർമ്മിക്കുകയും സംവിധാനം ചെയ്യുകയും ചെയ്തിട്ടുണ്ട്. തിരക്കഥാരചനയിലും സംഭാവനകൾ നൽകിയിട്ടുണ്ട്. 1997ൽ ദേശീയ സിനിമാ അവാർഡ് ജൂറിയംഗം ആയപ്പോഴത്തെ അനുഭവമാണ് അദ്ദേഹം ബാലചന്ദ്രമേനോനോട് തുറന്നുപറഞ്ഞത്. മേനോൻ സംവിധാനം ചെയ്ത സമാന്തരങ്ങൾ എന്ന സിനിമക്ക് തീരുമാനിച്ച അവാർഡുകൾ ജൂറി പിന്നീട് മാറ്റിനൽകി എന്നാണ് വെളിപ്പെടുത്തിയത്.

Also Read: ശിവൻകുട്ടി പറയാൻ ബാക്കിവച്ചതോ ബാലചന്ദ്രമേനോൻ പറഞ്ഞുതീർത്തത്… സുരേഷ് ഗോപിയുടെ ദേശീയ അവാർഡ് ചർച്ചയാകുമ്പോൾ

സിനിമാ ജീവിതത്തിൻ്റെ അമ്പതാം വാർഷികാഘോഷ ചടങ്ങിലാണ് ഇന്നലെ ബാലചന്ദ്രമേനോൻ ദേശീയ അവാർഡിലെ ഈ അട്ടിമറി തുറന്നുപറഞ്ഞത്. വെറുതെ പറയുക മാത്രമല്ല, അന്നത്തെ ജൂറിയിലെ മറ്റൊരു അംഗമായിരുന്ന ദേവേന്ദ്ര ഖണ്ഡേൽവാൾ തന്നോട് പറഞ്ഞതിൻ്റെയെല്ലാം വീഡിയോ കൂടി പുറത്തുവിട്ടു. തൻ്റെ സിനിമക്ക് നിശ്ചയിച്ച അവാർഡുകൾ അട്ടിമറിച്ചു എന്ന് മാത്രമല്ല, തനിക്ക് തീരുമാനിച്ച മികച്ച നടനുള്ള ദേശീയ അവാർഡ് സുരേഷ് ഗോപിക്ക് കൂടി പങ്കിട്ട് നൽകാനുള്ള തീരുമാനവും അവസാനഘട്ടത്തിൽ ജൂറിയെടുത്തു. ജൂറിയിലെ ഏക മലയാളി സംവിധായകൻ കെആർ മോഹനൻ്റെ ഇടപെടലിലാണ് ഈ അട്ടിമറിയെല്ലാം നടന്നതെന്ന് ഖണ്ഡേൽവാൾ പറഞ്ഞു എന്നാണ് മേനോൻ വെളിപ്പെടുത്തിയത്.