മരിച്ച ഭർത്താവിനൊപ്പം ഭാര്യ ഉറങ്ങിയത് ആറ് ദിവസം; മകൻ തേടിച്ചെന്നിട്ടും തിരിച്ചറിഞ്ഞില്ല

ഭർത്താവ് മരിച്ചതറിയാതെ ഭാര്യ അതേ വീട്ടിൽ ഒപ്പം താമസിച്ചത് ആറ് ദിവസം. മാനസിക വെല്ലുവിളി നേരിടുന്ന ഭാര്യയുമായി ഭർത്താവ് കഴിഞ്ഞ പത്ത് വർഷമായി താമസിച്ച് വരുകയായിരുന്നു. വീട്ടിൽ നിന്നും ദുർഗന്ധം ഉയർന്നതിനെ തുടർന്ന് അയൽവാസികളുടെ പരാതി ഉയർന്നതോടെയാണ് മുത്തശ്ശിയുടെ വീട്ടിലായിരുന്ന മകൻ വന്ന് അന്വേഷിച്ചത്. കോയമ്പത്തൂർ ഉക്കടം കോട്ടൈപുതൂർ ഗാന്ധി നഗറിലെ അബ്ദുൽ ജാഫർ ആണ് മരിച്ചു ആറ് ദിവസം കട്ടിലിൽ കിടന്നത്.

മകൻ അന്വേഷിച്ചപ്പോൾ എലി ചത്ത മണമായിരിക്കുമെന്ന് അമ്മ പറയുകയും അബ്ദുൽ ജബ്ബാർ കിടക്കയിൽ ഉറങ്ങിക്കിടക്കുന്നത് കാണുകയും ചെയ്തതോടെ മകൻ തിരിച്ച് പോവുകയായിരുന്നു. പിന്നീട് ദുർഗന്ധം സഹിക്കാൻ കഴിയാത്ത അവസ്ഥയതോടെ അയൽക്കാർ വീണ്ടും മകനെ വിളിച്ച് അറിയിക്കുകയായിരുന്നു. തുടർന്ന് നടത്തിയ പരിശോധനയിലാണ് കിടക്കയിൽ കിടക്കുന്ന അച്ഛന്റെ ശരീരത്തിൽ നിന്നാണ് ദുർഗന്ധം ഉണ്ടായതെന്ന് മനസിലായത്.

വിവരമറിയിച്ചു പൊലീസെത്തി പരിശോധിച്ചപ്പോഴാണ് മരിച്ചിട്ട് ആറ് ദിവസമായിട്ടുണ്ടെന്ന് കണ്ടെത്തിയത്. അമിത മദ്യപാനം മൂലം മരിച്ചതാണെന്നാണ് നിഗമനം.ജാഫർ മദ്യത്തിന് അടിമയായതിനാൽ മകനും മകളും മുത്തശിക്കൊപ്പമാണ് താമസിച്ചിരുന്നത്.