പൊലീസ് സ്റ്റേഷൻ പീഡന കേന്ദ്രമോ? നീതിക്ക് വേണ്ടി വനിതാ കോൺസ്റ്റബിൾ കാത്തിരുന്നത് 8 മാസം

പൊലീസ് സേനയ്ക്കുള്ളിൽ നടന്ന ഞെട്ടിക്കുന്ന ലൈംഗിക അതിക്രമ കേസിൽ, എട്ട് മാസത്തിന് ശേഷം എഫ്ഐആർ. ഉത്തർപ്രദേശിലെ ബൽറാംപൂർ ജില്ലയിൽ മൂന്ന് പൊലീസുകാർക്കെതിരെയാണ് എഫ്ഐആർ രജിസ്റ്റർ ചെയ്തത്. പൊലീസ് സ്റ്റേഷനിൽ വച്ച് തൻ്റെ സഹപ്രവർത്തകരായ മൂന്ന് പൊലീസുകാർ ലൈംഗികമായി ഉപദ്രവിച്ചു എന്നാണ് വനിതാ കോൺസ്റ്റബിളിന്റെ പരാതി.

കുറ്റകൃത്യം നടന്ന് മാസങ്ങൾക്ക് ശേഷമാണ് എഫ്ഐആർ രജിസ്റ്റർ ചെയ്യാൻ അധികൃതർ തയ്യാറായത്. പ്രതികളായ പൊലീസുകാർ പ്രാഥമികമായി കുറ്റക്കാരാണെന്ന് കണ്ടെത്തിയതിനെ തുടർന്നാണ് നടപടി. 2025 മാർച്ച് 5ന് പൊലീസ് സ്റ്റേഷനിലെ ഔദ്യോഗിക ഹോളി ആഘോഷ ദിവസമാണ് കേസിനാസ്പദമായ സംഭവം നടന്നത്. 30 വയസ്സുള്ള വനിതാ കോൺസ്റ്റബിളിന് നേരെയാണ് ആക്രമണം നടന്നത്.

ഹോളി ആഘോഷങ്ങൾക്ക് ശേഷം പുറത്തുപോയ കോൺസ്റ്റബിൾ വനിതാ ഹെല്പ് ഡെസ്കിൽ നിന്ന് താക്കോലെടുക്കാൻ 11:45 ഓടെ തിരികെ എത്തി. ഈ സമയം, ഹെഡ് കോൺസ്റ്റബിളും രണ്ട് കോൺസ്റ്റബിൾമാരും ചേർന്ന് യുവതിയെ തടഞ്ഞുനിർത്തുകയും ബലമായി ദേഹത്ത് സ്പർശിക്കുകയും നിറങ്ങൾ പുരട്ടുകയും അശ്ലീല പരാമർശങ്ങൾ നടത്തുകയും ചെയ്തു എന്ന് പരാതിയിൽ പറയുന്നു. ഇവിടെ നിന്ന് രക്ഷപ്പെട്ടതിന് ശേഷം, അന്ന് വൈകുന്നേരം തന്നെ സ്റ്റേഷൻ ഇൻ ചാർജിനെ വിവരം അറിയിച്ചതായും യുവതി പരാതിയിൽ പറയുന്നു.

ഹോളി സംഭവത്തിന് മുൻപും പ്രതികളിൽ ഒരാൾ തന്നോട് അപമര്യാദയായി പെരുമാറിയിട്ടുണ്ടെന്നും, അന്ന് അയാൾ ക്ഷമ ചോദിച്ചതുകൊണ്ട് നിയമനടപടിയുമായി മുന്നോട്ട് പോയില്ലെന്നും വനിതാ കോൺസ്റ്റബിൾ മൊഴി നൽകി. എന്നാൽ, മാർച്ച് മാസത്തിലെ സംഭവത്തിന് ശേഷം എഴുതി നൽകിയ പരാതിയിൽ പോലും മാസങ്ങളോളം ഒരു നടപടിയും ഉണ്ടായില്ല. തുടർന്നും പ്രതികൾ തന്നെ സമീപിച്ചത് മാനസികമായി കൂടുതൽ ബുദ്ധിമുട്ടിലാക്കിയെന്നും പരാതിക്കാരി പറയുന്നു. ഇതോടെ, നടപടി ആവശ്യപ്പെട്ട് നവംബർ 16ന് അവർ മുതിർന്ന ഉദ്യോഗസ്ഥന് പരാതി നൽകുകയായിരുന്നു.

ബൽറാംപൂർ എസ്പി സംഭവത്തെക്കുറിച്ച് അന്വേഷിക്കാൻ വിശാഖ കമ്മിറ്റി രൂപീകരിച്ചു. കമ്മിറ്റി ഉപദ്രവം നടന്നതായി സ്ഥിരീകരിച്ചെങ്കിലും തുടക്കത്തിൽ എഫ്ഐആർ എടുത്തില്ല. വിശദമായ വകുപ്പുതല അന്വേഷണത്തിൽ മൂന്ന് പൊലീസുകാരും കുറ്റക്കാരാണെന്ന് കണ്ടെത്തിയതിനെ തുടർന്ന് ഇവരെ സസ്പെൻഡ് ചെയ്തത്.