ലോകത്തിലെ ഏറ്റവും ഉയരം കൂടിയ യുദ്ധ സ്മാരകം; ഗാൽവാൻ വീരന്മാർക്ക് ആദരമർപ്പിച്ച് ഇന്ത്യ

2020ലെ ഇന്തോ ചൈന സംഘർഷത്തിൽ വീരമൃത്യു വരിച്ച ധീരസൈനികർക്കായി ലോകത്തിലെ ഏറ്റവും ഉയരം കൂടിയ യുദ്ധ സ്മാരകം ലഡാക്കിലെ ഗാൽവാൻ താഴ്‌വരയിൽ ഒരുങ്ങി. ചൈനീസ് അതിർത്തിയോട് ചേർന്നുള്ള തന്ത്രപ്രധാനമായ പ്രദേശത്ത് സ്ഥിതി ചെയ്യുന്ന ഈ സ്മാരകം രാജ്യത്തിൻ്റെ പരമാധികാരം സംരക്ഷിക്കാൻ ജീവൻ ബലിയർപ്പിച്ച 20 ഇന്ത്യൻ സൈനികർക്കുള്ള ആദരവാണ്. പ്രതിരോധ മന്ത്രി രാജ്‌നാഥ് സിംഗ് ആണ് സ്മാരകം ഉദ്ഘാടനം ചെയ്തത്.

കിഴക്കൻ ലഡാക്കിലെ ഗാൽവാൻ താഴ്‌വരയോട് ചേർന്നുള്ള ‘പോസ്റ്റ് 120’ പ്രദേശത്താണ് ഈ സ്മാരകം നിർമ്മിച്ചിരിക്കുന്നത്. ഏകദേശം 16,000 അടി വരെ ഉയരത്തിലുള്ള മലനിരകളിലാണ് ഈ സ്മാരകം സ്ഥിതിചെയ്യുന്നത്. 2020 ജൂൺ 15ന് ഗാൽവാൻ താഴ്‌വരയിൽ ഇന്ത്യൻ സൈന്യവും ചൈനീസ് സേനയുമായി നടന്ന കൈയേറ്റ പോരാട്ടത്തിൽ കൊല്ലപ്പെട്ട സൈനികരെയാണ് ഇവിടെ അനുസ്മരിക്കുന്നത്.

ഓപ്പറേഷൻ സ്നോ ലെപ്പർഡ്’ എന്ന പേരിൽ നടന്ന സൈനിക നീക്കത്തിൻ്റെ വിശദാംശങ്ങൾ സ്മാരകത്തിൽ രേഖപ്പെടുത്തിയിട്ടുണ്ട്. കൂടാതെ, വീരമൃത്യു വരിച്ച 20 സൈനികരുടെയും പേരുകൾ ‘ഗാൽവാൻ്റെ ധീരന്മാർ’ എന്ന പേരിൽ സ്മാരകത്തിൽ ആലേഖനം ചെയ്തിട്ടുണ്ട്. അതീവ തണുപ്പും വെല്ലുവിളികളും നിറഞ്ഞ അന്തരീക്ഷത്തിൽ രാജ്യത്തിന് വേണ്ടി പോരാടിയ സൈനികരുടെ ത്യാഗവും ധീരതയും വരും തലമുറയ്ക്ക് ഓർമ്മപ്പെടുത്താൻ വേണ്ടിയാണ് ഇന്ത്യൻ സൈന്യം ഈ സ്മാരകം നിർമ്മിച്ചത്.

തന്ത്രപ്രധാനമായ ദർബുക് ഷ്യോക് ദൗലത് ബേഗ് ഓൾഡി (DBO) റോഡിന് സമീപത്താണ് ഈ സ്മാരകം സ്ഥിതി ചെയ്യുന്നത്. സൈന്യത്തിൻ്റെ പ്രത്യേക അനുമതിയോടെ മാത്രമേ സാധാരണ പൗരന്മാർക്ക് നിലവിൽ ഈ പ്രദേശം സന്ദർശിക്കാൻ സാധിക്കുകയുള്ളൂ.