‘ഡ്രാഗണും ആനയും ഒന്നിച്ചു നൃത്തം ചെയ്യണമെന്ന്’ ആഹ്വാനം; റിപ്പബ്ലിക് ദിനത്തിൽ ആശംസകളുമായി ഷി ജിൻപിങ്

ഇന്ത്യയുടെ 77മത് റിപ്പബ്ലിക് ദിനാഘോഷ വേളയിൽ ആശംസകളുമായി ചൈനീസ് പ്രസിഡന്റ് ഷി ജിൻപിങ്. ഇന്ത്യയും ചൈനയും ‘നല്ല അയൽക്കാരും സുഹൃത്തുക്കളും പങ്കാളികളും’ ആയിരിക്കണമെന്നാണ് തന്റെ ആഗ്രഹമെന്ന് രാഷ്ട്രപതി ദ്രൗപതി മുർമുവിന് അയച്ച സന്ദേശത്തിൽ അദ്ദേഹം വ്യക്തമാക്കി.

കഴിഞ്ഞ ഒരു വർഷത്തിനിടെ ഇന്ത്യയും ചൈനയും തമ്മിലുള്ള ബന്ധം മെച്ചപ്പെട്ടതായും വികസിച്ചതായും ഷി ജിൻപിങ് ചൂണ്ടിക്കാട്ടി. ലോക സമാധാനത്തിനും പുരോഗതിക്കും ഇരുരാജ്യങ്ങളും തമ്മിലുള്ള സഹകരണം അത്യന്താപേക്ഷിതമാണെന്ന് അദ്ദേഹം പറഞ്ഞു. ഇന്ത്യ-ചൈന ബന്ധത്തെ സൂചിപ്പിക്കാൻ ചൈന പലപ്പോഴും ഉപയോഗിക്കാറുള്ള ‘ഡ്രാഗണും ആനയും ഒന്നിച്ചു നൃത്തം ചെയ്യുന്നു’ എന്ന ശൈലി അദ്ദേഹം ഇത്തവണയും ആവർത്തിച്ചു. ഇരുരാജ്യങ്ങളും പരസ്പരമുള്ള ആശങ്കകൾ പരിഹരിക്കണമെന്നും ആരോഗ്യകരവും സുസ്ഥിരവുമായ നയതന്ത്ര ബന്ധം പ്രോത്സാഹിപ്പിക്കാൻ വിനിമയങ്ങൾ വിപുലീകരിക്കണമെന്നും അദ്ദേഹം സന്ദേശത്തിൽ ആവശ്യപ്പെട്ടു.

Also Read : ട്രംപിന്റെ ഭീഷണികൾക്ക് പുല്ലുവില; ചൈനയെ കൂടെക്കൂട്ടി ഇന്ത്യ

2020-ലെ ഗാൽവൻ സംഘർഷത്തിന് ശേഷം വഷളായ ബന്ധം കഴിഞ്ഞ വർഷം മുതലാണ് മെച്ചപ്പെട്ടു തുടങ്ങിയത്. 2024 ഒക്ടോബറിൽ റഷ്യയിൽ നടന്ന ബ്രിക്സ് (BRICS) ഉച്ചകോടിക്കിടെ പ്രധാനമന്ത്രി നരേന്ദ്ര മോദിയും ഷി ജിൻപിങ്ങും നടത്തിയ കൂടിക്കാഴ്ച ബന്ധം പുനഃസ്ഥാപിക്കുന്നതിൽ നിർണ്ണായകമായിരുന്നു. 2025-ൽ ഇരുരാജ്യങ്ങൾക്കുമിടയിൽ നേരിട്ടുള്ള വിമാന സർവീസുകൾ പുനരാരംഭിക്കുകയും വ്യാപാര നിക്ഷേപങ്ങൾ വർദ്ധിക്കുകയും ചെയ്തിട്ടുണ്ട്. യുഎസ് പ്രസിഡന്റ് ഡൊണാൾഡ് ട്രംപിന്റെ പുതിയ വിദേശനയങ്ങളുടെ പശ്ചാത്തലത്തിൽ, ഏഷ്യയിലെ രണ്ട് വൻശക്തികൾ ഒത്തുപോകുന്നത് ആഗോള രാഷ്ട്രീയത്തിൽ വലിയ പ്രാധാന്യത്തോടെയാണ് നോക്കിക്കാണുന്നത്.